utoqqatserneq
Akitsuutinit 8 millionit koruunit pisiniarfinnut utertinneqassapput
Akitsuutit nutaat arlallit kingumoortumik atuutilermissaannik aalajangiineq peqqissimissutigineqarnerata kingorna, Namminersorlutik Oqartussat pisiniarfinnut millionit koruunit arlalinnik utertitsillutik akiliilerput
Inatsisartut ullumikkut imeruersaatit koffeinimik akullit aamma imeq puiaasameersumut akitsuutinik siunnersuummik oqallisiginninneranni Naalakkersuisut allamik iluarsisaqarniarput.
Tassami suliffeqarfiit arlalippassuit namminersorlutik oqartussanit, ilaatigut mamakujuttunnut akitsuutinut siorna akiliutigisatik tigoqqilerpaat.
Atuaruk: Arraa! Mamakujuttunut akitsuut nutaaq kingumoortumik atuuttoq
Maanna utertitsineq
Inatsisip kingumoortumik atuutilertussap kingunissaanut naliliinermi Naalakkersuisut paasissutissat atugaat kukkuneqartut paasinarsimmat, utertitsilluni akiliineq pivoq.
Katillugu 8 millionit koruunit utertinneqassapput, Radioaviisi oqaluttuarpoq.
Akitsuutit nutaat atorfilittat naliliinerannit siullermit annertunerusumik eqquipput. Tamannalu tunngavigalugu akitsuutinik kingumoortumik akiliisut tamarmik aningaasaatitik tigoqqissagaat tulluartuusoq Naalakkersuisut isumaqarput.
KNR-imi atuaruk: Inatsisartuni ullormut pisussat
Tamanut utertinneqassasut
Tassani pisiniarfiit piffissami aggustip 20-anit novembarip 23-anut akilersimasaat pineqarput.
Tamannalu pissaaq pisiniarfiit ilaasa akitsuutinut qaffaatit atuisartunit akilerneqartussanngorlugit nioqqutissaatiminnik akitsuisimagaluarpataluunniit.
Atuaruk: Akitsuusiineq Qujaukitsup misissorniarpaa
Atuaruk: Naalakkersuisut mamakujunnut akitsuutit pillugit nutaamik siunnersuusiortut
Ulloq 19/4 11.15 allaaserisami allaqqavoq, akuersineq kukkusumik tunngaveqarluni pimmat akitsuutit utertinneqartut. Tamanna eqqunngilaq, Sermitsiaq.AG-llu tamanna utoqqatsissutigaa.