qalerallit akii
Akit unammissutigineqarnerat unammilleqatigiinnermut aqutsisoqarfimmut ingerlateqqinneqartut
Nunatsinni unammilleqatigiinnermut aqutsisoqarfik maanna suliffeqarfissuup Royal Greenlandip aamma suliffeqarfiup minnerujussuup akornanni narrutsassimaartumik akerleriinnermut tunngasumi ilanngunneqarpoq
Kitaa Seafoodimi pisortaaneq, Robert Møller, unammilleqatigiinnermut aqutsisoqarfimmut Royal Greenland unnerluutiginiarlugu Sermitsiaq.AG-mut ilisimatitsissutigaa, aqutsisoqarfimmillu ataatsimeeqateqarnissaq ullulerneqareerpoq.
- Royal Greenlandip siuttuulluni inissisimanini atornerlukkaa ataatsimiinnermi uppernarsaatinik saqqummiussiniarpunga - minnerunngitsumik ingerlatsivik Namminersorlutik Oqartussanit pigineqartutut, Robert Møller ilisimatitsivoq.
Akerleriissutaasup qitia
Qalerallit akii qassiussanersut akerleriissutaasup qiteraa.
Royal Greenland maanna aalisakkat sumut tunineqarneri apeqqutaatillugit akinik assigiinngitsunik akeqartitsivoq. Akillu assigiinngitsorujussuusut paasineqarpoq.
Nuummi kiilumut akia 4 koruuninik februaarip aallartinnerani qaffappoq, maannalu kiilumut 30 kooruneqarluni. Sinerissami tunitsivinni allani akigitinneqartoq 16,50 koruuniinnaapput.
Aamma atuaruk: Nuummi qalerallit akii narrutsassimaartumik unammissutigineqartoq
Tamanna assigiinngissutaasoq Robert Møllerip tupigusuutigaa, ataasiinnarmillu nassuiaatissaqartippaa:
- Royal Greenlandip suliffeqarfipput ipisissallugu kissaatigaa. Qalerallit akii taama assigiinngitsigineri paasisassaanngilaq, taanna oqarpoq, unnersuutigaalu nunarsuarmi niuernermi qalerallit akii qaffakkiartorunnaarsimasut.
Royal Greenland nassuiaavoq
Royal Greenlandimi avataani attaveqaatinut sulisoqarnermullu pisortaq Jens K. Lyberth Sermitsiamut oqarpoq:
- Suliffissuarnut aningaasarpassuit atorlugit aningaasaliivugut, pisiniartartutsinnullu tunisinissamik isumaqatigiissuteqarluta, taamaattumillu aningaasaliinivut illersorsinnaaniarlugit sumiiffinni unammillerfiusuni akitisut malinnaasariaqarluta qulakkeerlugulu pisisartutsinnut pisussaaffivut naammassisinnaaniarlugit tunisassiassanik qulakkeerinissarput. Taamaattumik sumiiffinni unammillerneqarfitsinni ilungersorpugut.
Akerleriinnermut tunuliaqutaasoq tamaat Sermitsiami ullumi saqqummertumi atuaruk, tassani Hans Enoksen ilaatigut apersorneqarpoq. Uani linki atorlugu akiliillutik atuarsinnaavat: