taasineq
Akissarsiaqqortunerit immikkut akileraaruserneqarnissaat isumassarsialatsiaava?
Akissarsiaqqortunerit ukiumut 1 millionit koruunit sinnerlugit immikkut akileraaruserneqarnissaat aningaasaqarnermut inatsissatut siunnersuummi ilanngunniarneqarpoq. Illit qanoq isumaqarpit?
Naalakkersuisut akissarsiaqqortunerit immikkut akileraaruserneqarnissaat 2019-imi atuutsilernissaa eqqarsaatersuutigaat. Tamanna aningaasanut inatsisissatut siunnersuummi allassimavoq.
Inuit ukiumut 1 milionit koruunit sinnerlugit isertitallit 10 procentimik immikkut akileraaruserneqarpata, tamanna nunatta karsianut 2-3 millionit koruunit missaanni isertitaqassutigissavaa.
Akissarsiaqqortunerit immikkut akileraaruserneqarnissaannut isumassarsisoqarsimanera politikkikkut annertuumik tapersersorneqanngilaq. Maannamummi Inuit Ataqatigiit partiini kisiartaallutik tapersiipput. Akissarsiat aallavigalugit akileraarusiisarnissaq 2014-imi qineqqusaarnerup nalaani Siumukkormiunit akerlerineqarpoq.
Akissarsiaqqortunerit immikkut akileraaruserneqarnissaat aningaasaqarnermut inatsisissatut siunnersuummi eqqaaneqarluartoq imaanngilaq atuutsinneqalerniartoq. Aningaasaqarnermut inatsisissatut siunnersuutip saqqummiunneqarnerani Aningaasaqarnermut Akileraartarnermullu Naalakkersuisup, Aqqaluaq B. Egedep tamanna aalajangiusimannginnerarpaa.
Demokraatit siunnersuummut akerliunertik nalunaarutigereerpaat.
- Isumaqatiginanngilluinarpoq akissarsiaqqortunerit immikkut akileraarutaannik saamerliit naalakkersuisoqatigiit atuuttussanngortitsiniarnerat, Inatsisartuni ilaasortaq Nivi Olsen oqarpoq
Kisianni illit qanoq isumaqarpit? Taasigit allaaserisallu ataani allallutit.