Akiliutsilluni angalanernut tunngatillugu Kielsen mianersortoq

Akiliutsilluni angalasarnermut inatsisissatut siunnersuut, maanna malittarisassanit marloriaatinngortitsinissamik siunnersuuteqartoq, sapaatip-akunnerata siuliani Inatsisartut Siulittaasoqarfianit saqqummiunneqarpoq, Sermitsiaq.AG-ip oqallittarfiini tamanna amerlasuunit qisuariarfigineqarpoq.

Atuartartut: Nammineq akiliiniaritsi
Atuartartut akornanni isuma malunnartoq tassaavoq, naalakkersuinermik suliaqartut taamatut akilerneqassanngitsut, ilaquttami angalanerinut namminneq akiliisinnaagamik.

Oqallinnermit tigulaakkat pingasut aajuku:

• Ilaquttami angalanerinut akiliinissaminnut naammattunik aningaasarsiaqarput.
• Nuup avataani najugaqartut qineqqusaalinnginnerminni atugassarititaasut taamaattut nalunngereerpaat!
• Ajoraluartumik inuiaqatigiit sullinneqannginnerat misinnarpoq, imminut sullittoqarpoq.

Allaaserisaq aamma oqallinnerit uani atuakkit: Politikerit ilaqutaannut akiliutsilluni angalanerit amerlanerusut

Naalakkersuisut siulittaasuat, Kim Kielsen, akissuteqaammi akiliutsilluni angallannernut ima oqaaseqarpoq:

- Naalakkersuisut maluginiarpaat Inatsisartuni ilaasortat ilaqutariinnikkut inuunerisa eqqarsaatigineqarnerunissaanik kissaateqarneq aallaavigalugu ilaquttat ilagineqartarnissaat pillugu siunnersuut saqqummiunneqartoq.

Tamatuma kingorna Kim Kielsenip ilisimatitsissutigaa, inatsisissatut siunnersuutip immikkoortuata aappaa soraarnerussutisiaqarnerup aaqqissuussinerni akissarsiaqartitsineq pillugu inatsimmi aalajangersakkat allanngortinneqarnissaat tapersersorlugu, malittarisassanut nutaanut 1. januar 2018-imi atuutilersussanut naapertuunnissaat qulakkeerneqassammat.

Tusaatissatut tiguneqartoq
Naggataatigut Naalakkersuisut Siulittaasoqarfiat ima allappoq:

- Taamatut oqaasertalerlugu siunnersuut Naalakkersuisunit tusaatissatut tiguneqarpoq.