Akiliisinnaajunnaartumit Tasiilami 30-t soraarsitaapput

Tasiilami entreprenøritut ingerlatsivik Viking Greenland sapaatip akunnerani uani akiliisinnaajunnaarmat inuit 30-t suliffissaarupput, taamatut paasissutissiivoq Kommuneqarfik Sermersooq.

Akiliuppai

Tuniuinermut Atugarissaarnermullu Ingerlatsiviup sulisuusimasut akissarsiassai akilerpai. Aningaasat takkua kingorna Danmarkimi Løndmodtagernes Garantifondimit akilersinneqarumaarput, kommuni paasissutissiivoq.

Annaasaqassaaq

Akiliisinnaajunnaarneq Kommuneqarfik Sermersuumut aningaasatigut qanoq kinguneqassanersoq suli ilisimaneqanngilaq.

– Qularutissaanngilaq Viking Gereenlandip akiliisinnaajunnaarnera Kommuneqarfik Sermersuumut aningaasatigut annaasaqaataassasoq immikkullu sulingaatsiarnerik kinguneqassasoq, maannakkorpiarli Tasiilami innuttaasunut ajornartorsiutiviit aaqqinniaqqaassavagut, Kommuneqarfik Sermersuumi pisortaaneq Steffen Ulrich-Lynge paasissutissiivoq.

Entreprenørituaq

Viking Byg Tasiilami entreprenørituaasimavoq, taamaattumillu kommunimi arlalinnik suliassaqartarsimalluni. Taamaattumik qularutissaanngilaq taassuma akiliisinnaajunnaarnera illoqarfimmut kinguneqassasoq, Kommuneqarfik Sermersioq erseqqissaavoq.

Sanaartukkat arlallit

Viking Greenlandip Tasiilami sanaartukkat arlallit ingerlassimavai. Ilaatigut meeqqanut 88-inut ulluunerani paaqqinnittarfik nutaaq. Inissianik nutaanik qulinik sananeq aammalu illoqarfiup kujasinnerusuani nutaamik kuuffiliorneq.

– Sanaartornermut immikkoortoqarfik aaqqiissutissarsiorpoq, suliat sapinngisamik piaarnerpaamik nanginneqaqqullugit. Ulluunerani paaqqinnittarfissaq matuneqareersimavoq taamaattumik ukiuunerani atasinnaavoq. Taamatuttaaq inissianit qulinit arfineq-pingasut matuneqareersimapput. Ukiortinnaguli inissiat marluk qulakkeerneqassapput, kommuni paasissutissiivoq.

Aputaajaaneq

Viking Greenland Tasiilap ilarujussuani aputaajaasarsimavoq. Suliassaq tamanna Kommuneqarfik Sermersuup nammineq tigussavaa, aaqqiissutissamik ataavartumik nassaartoqarnissaata tungaanut.

Ilerrit

Viking Greenland Tasiilami ilivernik assaasartuusimavoq. Suliassaq tamanna akiliisinnaajunnaartup pigisaanit ingerlanneqassaaq, aaqqiissutissamik ataavartumik nassaartoqarnissaata tungaanut.