akileraarpallaarutinut utertoorutissat
Akileraartartut katillugu 158,5 millionit koruuninik utertuussapput
Akileraartarnermut Aqutsisoqarfiup 2016-imut inaarummik naatsorsuutit 48.200 sinnerlugit akileraartartunut nassiussuuteqqammerpai, utertoorutissat tamarmiusut 30 procentiisa missaat pisortanut akiitsunut matusissutigalugit akilersinneqarput
2017-imi augustip 31-iani Akileraartarnermut Aqutsisoqarfiup ukiumut akileraarfiusumut 2016-imut akileraarpallaarutinut utertoorutissat 158,5 mio. koruunit inunnut 22.390-nut utertissavai.
- Akileraartarnermut Aqutsisoqarfiup 158,5 mio. koruuninit ilanngaassinikkut, pisinnaatitaaffimmik tigusisoqarneratigut akiliisitsinikkut kiisalu pigisanik qularnaveeqqutitut sillimmasiinikkut 46 mio. koruunit (utertoorutissat tamarmiusut 29 %-iisa missaat) pisortanut akiitsunut matusissutigalugit akilersinneqarput, Namminersorlutik Oqartussat allapput.
Aamma atuaruk: Taamaattumik skat-mut akiligassinneqartarputit - utertoorlutilluunniit
Inissiaatileqatigiiffinnut Namminersorlutik Oqartussanulli akiitsut
26 mio. koruunit Kalaallit Nunaanni kommuninut, inissiaatileqatigiiffinnut Inimut Iseritsimullu aammalu Nukissiorfinnut il.il. akiitsunut matusissutitut akilersinneqarput, sinneruttut 20 mio. koruunit Kalaallit Nunaanni Namminersorlutik Oqartussanut akiitsunut matusissutigineqarput.
- Akileraartartut akileraarpallaarummik utertoorutissaat, pisortanut akiitsunut, tamakkiisumik ilaannakuusumilluunniit matussutissatut atorneqarsimatillugit immikkut ittumik allakkatigut nalunaarfigineqassapput, Akileraartarnermut Aqutsisoqarfik paasissutissiivoq.
Akileraarutissat sinnerinut akiligassat 190,6 millionit
Matumunnga peqatigitillugu 2016-imut akileraarutissat sinnerinut akiligassat 190,6 mio. koruunit akileraartartunit 10.355-init akileqquneqassapput. Taakkunannga 57,9 mio. koruunit missaat 2018-imut siumoortumik nalunaarsuinermut atatillugu ilanngunneqassapput, Akileraartarnermut Aqutsisoqarfik paasissutissiivoq.
Sinnerilu 132,7 mio. koruunit pingasunngorlugit avillugit akiligassanngortinneqassapput ulluni 01/09, 01/10 aamma 01/11-2017-imi, kingusinnerpaamillu akilerneqareersimassallutik qaammatip akiliiffissap ulluisa 20-anni.
Akileraartarnermut Aqutsisoqarfiup 2017-imi upernaakkut akileraarpallaarutit § 15 naapertorlugu (akileraarpallaarutinik siusinaartumik utertitsineq), ukiumut akileraarfiusumut 2016-imut utertoorutissat 16,6 mio. koruunit inunnut 1.076-inut utertippai.
3,6 mio. koruunillu, pisortanut akiitsunut matusissutigalugit akilersinneqarput.