Akileraartarermut Aqutsisoqarfik: Akileraartartut akileraarutissat sinneri paatsuungassutigisarpaat

2016-imut inaarummik naatsorsuutit saqqummiunneqaqqammerput, akileraartartulli paatsuungallutik Akileraatarnermut Aqutsisoqarfimmut saaffiginnittut amerlasimapput.

- Inaarumik naatsorsuutit saqqummiunneqaraangata akileraartartunit paatsuungassutaasartoq tassaagunarpoq oqaaseq atorneqartartoq nalinginnaanerpaaq "Akileraarutissat sinnerinut akiligassaq ukiup tullianut ingerlateqqinneqartussaq" tamannalu paatsuugassutigalugu Akileraartarnermut Aqutsisoqarfimmi saaffiginnittarput, Ferdinand Hammeken, Akileraartarnermut Aqutsisoqarfimmi immikkoortoqarfimmi pisortaq oqarpoq.

Ukiup tulliani akilerneqartussaq

Inaarummik naatsorsuummi taamatut allassimasoqartillugu akileraarutissat sinnerinut akiligassamik nassitsisoqarnavianngilaq, akiligassanngortutulli allassimasoq ukiup tullianut siumoortumik nalunaarsuinermut ingerlateqqinneqassalluni.

- Taamaaliortoqassatillugu ukiumi tulliuttuni skattekortimi ilanngaatissat appartinneqarneratigut akilersinniarneqartussaassallutik, immikkoortoqarfimmi pisortaq nassuiaavoq.

Massakkut akilerneqarsinnaasoq

Taama pisoqartillugu akileraarutissat sinnerinut akiligassamik nassitsisoqarnavianngilaq. Akileraarutissallu sinneri ukiumi tullianut siumoortumik nalunaarsuinermut ikkunneqarnissaat kissaatiginngikkaanni, akileraarutissaat sinneri massakkut akilerneqarsinnaapput.

- Akiliinerlu kingusinnerpaamik ukioq manna akileraarfiusumik 20. november qaangiutsinnagu pissaaq, taamaaliorinikkullu 6 procenti ilassutigineqartartoq "sipaarneqassaaq", Ferdinand Hammeken paasissutissiivoq.

Akileraarutinut akiligassaqalersinnaanermut pissutsit assigiinngitsorujussuupput. Ilaatigut ukuusinnaallutik:

• siumoortumik nalunaarsuinermi kisitsisitaat piviusorsiortut nalunaarutigineqanngippata
• imaluunniit siumoortumik nalunaarummik allannguinermik qinnuteqartoqasimanngippat
• imaluunniit Akileraartarnermik Aqutsisoqarfiup siumoortumik nalunaarsuinermi ilimagisat akinaveersaarneqarsimappata
• imaluunniit isertitat saniatigut isertitaasimasut paasissutissartaat amigarpata
• imaluunniit saniatigut isertitat (aningaasarsiat B-t) aamma/imaluunniit aningaasartuutit ilanngaatigineqarsinnaasut annerusumik/minnerusumik nikerarsimappata. Assersuutigalugu taaneqarsinnaapput aningaaserivimmit taarsigassarsinermi ernianut aningaasartuutit il.il. Tassa saniatigut isertitat aningaasartuutillu ilanngaatigineqarsinnaasut siumoortumik nalunaarsuinermit nikingassutaat annertusiartortillugu akileraarutissat sinnerinut akiligassat/akileraarutaavallaarsimasut annertusiartortarput.

Maluginiariuk

- Taamaattumik pingaaruteqarluinnarpoq akileraarutissat sinnerinut akiligassinneqannginnissaq pinaveersaartinniaraanni siumoortumik nalunaarsuinermi kisitsisit tunngavigineqartut kisitsisinik piviusorsiortunik tunngaveqarnissaat ukiup aningaasarsiorfiup ingerlanerani qulakkeerneqarnissaat. Ukiup aningaasarsiorfiup ingerlanerani siumoortumik nalunaarusiorneq sukkulluunniit allanngortinniarneqarsinnaavoq kisitsisit tunngavigineqartut allanngussatillugit, assersuutigalugu aningaaserivimmit taarsigassarsisoqarnerani ernianut aningaasartuuteqaleraani aningaasartuuteqarneruleraanniluunniit, Ferdinand Hammeken naqissusiivoq.