Akileraarnaveersaartartut Naalakkersuisunit sukateriffigineqalersoq

Akileraartarnermut aqutsisoqarfik pitsaanerusunik atugassaqartinneqalernissaa siunnersuutigineqarpoq, tassani suliffeqarfiit sinneqartoorutitik nunanut allanut nassiuttarneraat pitsaanerusumik takuneqarsinnaalernissaa anguniarneqarmat. Suliffeqarfiimmi taamaasiorpata akileraarnikinnerunissaq anguniarneqartarmat.

Tamanna aningaasaqarnermut naalakkersuisumit Vittus Qujaukitsumit (NQ) Inatsisartuni siunnersuut saqqummiuppaa ippassaq sisamanngormat.

- Siunnersuut manna aqqutigalugu Kalaallit Nunaanni isertitat pilersinneqartut, Kalaallit Nunaanni akileraaruserneqartarnissaat Naalakkersuisut pingaarnertut kissaatigaat, Vittus Qujaukitsoq saqqummiussinermini oqarpoq.

Siunnersuutikkut Naalakkersuisut uppernarsaasiinernut maleruagassanik erseqqinnerusunik aalajangersaanissamut piginnaatinneqarput. Piginnaatitsissutikkut tassuunakkut malittarisassanik OECD-p transfer pricingimik uppernarsaasiinermut kaammattuutaanut naapertuuttunik kinguneqassasoq naatsorsuutigineqarpoq.

- Uppernarsaasiineq tamanna akileraartarnermut ingerlatsiviit suliffeqarfinnik nuussinernillu aarlerinaatitigut naliliinissamut periarfissinneqarnissaat kiisalu nuussinernut Kalaallit Nunaannut akileraarnaveersaarnernut atorneqarnissamut aarlerinaateqarnerpaanut akileraartarnikkut nakkutilliinermik aallussilluni suliaqarnissamut periarfissiinissamik siunertaqarpoq, Vittus Qujaukitsoq oqarpoq.