nalliuttorsiorneq
Akikitsumik timmisartuussinissamut neqeroorput
Air Greenlandip nalliuttorsiornermini malunnartitsinini iluatsilluartoq nangillugu Nuummiut timmisartornissaanut arfininngornermi neqeroorfigai
S-61-ip Nunatsinni ukiunik 50-nngortorsiornera malunnartinniarlugu Air Greenland sapaatip akunnerata naanerani kaffillerniarpoq arfininngornermi sapaammilu ullaap tungaani quliniit. Pinasuarsinnaangaannilu aamma timmisartortoqarsinnaavoq.
Sapaatip akunnerata naaneranissaaq immikkuullarissumik S-61-imik Nuuk qulaavaallugu, akiliuteqalaarluni, timmisartornissamut periarfissaqassaaq. Taama timmisartornerup nuannersua amerlasuunit misigeqqinneqarsinnaassaaq, allanullu immaqa periarfissaq siulliullunilu kingulliussalluni. S-61-i 2012-imi Kujataani kingullermeerluni ilaasunik angallassivoq.
Air Greenlandip Kangerlussuarmiut sapaatit akunneri marluk matuma siorna nalliuttorsiorneq malunnartinniarlugu aggersarpai, taamaaliornerlu S-61 ulluinnarni nunaqarfimmi angerlarsimaffigisaani iluatsilluarpoq. Ippassaq, marlunngornermi, Nuummi qulimiguulimmik kaaviiartitsinissamut bilitsit amerlanngitsut tunisaalerput, taakkualu Air Greenlandip allaffeqarfianut nammineq ornigulluni siulliunniullunilu kisimik pisiarineqarsinnaapput.
Timmisartunut inissiisarfimmi kaffillerneq
Maannakkut sulisuusunit, sulisuusimasunillu takkuttunut sapaatip akunnerata naanerani ullup immikkuullarissumik misigineqarnissaa isumagineqassaaq. S-61-ip nuannarillualersimasatta piunerata oqaluttuassartaa pillugu, ilaquttatit ikinngutitillu ilagalugit, paasisaqarnissannut periarfissaqassaatit. Annaassiniarnermi SAR-imi atortut timmisartunik inissiisarfimmi saqqummersinneqassapput, S-61-it Kalaallit Nunaanni timmisartuussinerat pillugu saqqummiisoqassalluni, assitoqqat S-61-imut tunngasut takuneqarsinnaassallutik, meeqqanut aliikkusersuisoqassalluni soorunalumi aamma unammisitsisoqassalluni.
Ataqqinartorsuup Dronning Margrethep 75-iliineranut atatillugu pisortatigoortumik nalliuttorsiutiginninnerup kinguninngua S-61-i annaassiniarnermi qanoq periuseqartarnersoq pillugu Air Greenlandi, politiinngorniat ilinniarfiat Issittumilu Sakkutooqarfik suleqatigalugit, takutitsissaaq. Takutitsinissap aallartinnissaa nalunaaqutaq 12.30-p missaani pissasoq naatsorsuutigineqarpoq.