Nuuk
Akiitsullit qulit isertitsivimmi unnuisinneqartut
Nunatsinni illoqarfiit pingaarnersaanni politiit akiitsulinnik qulinik, akiliisitsarnermut eqqartuussivimmut aggersarneqaraluarlutik ornigussimanngitsunik, tigusarinnissimapput
Nuummi politiit sapaatip akunnerani kingullermi inunnik qulinik tigusarinnissimapput akiliisitsarnermut eqqartuussivimmukartussanik.
Inuit qulit taakkua pineqartut tamarmik akiitsoqartut, akiliisitsarnermut eqqartuussivimmut aggersarneqaraluarlutik orniguttarsimanngillat nalunaaruteqartarsimanatillu.
- Politiit ileqqorivaat akiliisitsarnermut eqqartuussivimmut aggersarneqarfik sioqqullugu unnukkut imaluunniit unnuaani pineqartoq tigusarisarlugu, Malik Olesen Nuummi Politimi politiassistenti oqaluttuarpoq, nangillunilu:
- Taava inuk pineqartoq tigusarineqartoq unnuisitsisarfimmullu inissinneqartarluni, kingornalu akiliisitsarnermut eqqartuussivimmut apuunneqartarluni.
Politiit inuit pineqartut qulit eqqartuussiviup tigusarinnittoqarnissaanut aalajangiinerata kingorna tigusarisimavaat.
Malik Olesenip ilanngullugu oqaluttuaraa ileqquusoq inuit pineqartut akiliisitsarnermut eqqartuussivimmeereeraangamik iperangaaqqittarnerat.
Atuaruk: Nuummi politiit nalunaarutaat