Akieraarutitigut peqquserlussimanermik unnerluussutit nutaat aningaaseriviup pisortaata eqqunnginnerarpai

Naalagaaffiup selskabiata Finsiel Stabilitet-ip imaluunniit Eik Bankip akileraarutitigut ilanngaatissat 90 millioner koruuninik nalillit pisassarai?

Jørn Astrup Hansenip, Eik Bankimi siulersuisunut ilaasortaasimasup, ukioq manna siusinnerusukkut aningaaserivimmi pisortat isornartorsiorpai pasillerlugillu TAKS-imut, Savalimmiuni akileraarutinik aqutsisoqarfimmut, paasissutissanik isertuussinerarlugit aammalu annaasat bankpakke 1-imi ilanngaatigineqareersimasut nalikilliliissutigisimanerarlugit.

Paasissutissat isertuussat

Mediehuset og Kringvarp Føroya (Savalimmiuni radio aamma tv) allagaatinik nassaarsimavoq, qularnanngitsumik takussutissiisunik Eik Bankip paasissutissat TAKS-imut toqqaannartumik isertuussimagai imaluunniit mianersuaalliorujussuarluni paasissutissat eqqortut oqartussaasunut tunniussimanngikkai.

Takusinnaanngilaat

Eik Bankip pisortaa Súni Schwartz Jacobsen oqarpoq pisimasumi allagaatit tamaasa tusagassiorfiit piginngikkaat, taamaattumillu pisimasumik tamakkiisumik takunnissinnaanngitsut.

Eik-ip 2010-mi akiliisinnaajunnaarnerata kingorna Finansiel Stabilitetip aningaaserivik tiguvaa. 2011-mi TF Holdingip aningaaseriviup 70 procentia pisiaraa. Kingusinnerusukkut, 2015-imi, Eik-ip sinneri 30 procentit pisiarai.

Finansiel Stabilitet aningaaserivimmut 2 milliarder koruuninik aningaasaliissuteqarsimavoq. Pigisalli misissorneqarnerisa takutippaa pigisat milliard koruunit affaanik nalikillineqartariaqartut.

Kina ilanngaatinik pisussaava?

2010-mi oktobarimi Finansiel Stabilitet nutaamik selskabiliorpoq (Eik Bank nutaaq), taassumalu Eik Bankitoqqami pigisat akiligassallu tiguvai. Eik Bankitoqaq 2010-mi oktobarip 8-anni atorunnaarpoq, Eik Bankilu nutaaq 2010-mi oktobarip 12-anni atulerluni.

Kingorna qularutigineqalerpoq akileraarutitigut ilanngaatissat milliard koruunit affai, pigisat nalikillilerneqarmata aningaaseriviup annaasimasai, kiap pisassarinerai.

Eik Bankip pisortaa Súni Schwartz Jacobsen TAKS-imut paasissutissiisimavoq aningaaseriviup aallaavigisimagaa aningaaseriviup 30. septembar 2010-mi nalinga, taamanikkut Eik-ip nutaap, Eikip pisortaa naapertorlugu, aningaaserivik tigummagu.

TAKS attaveqarfigisimavaat

Allagaatit, Mediehuset-ip siuleresuisut ataatsimiinnerinit takusinnaalersimasaasa, takutippaat siulersuisunut ilaasortat arlallit pisimasoq pillugu TAKS attaveqarfigisimagaat. Tamatumunnga pissutaasimavoq TF Holding Finansiel Stabilitetimit aningaaseriviullu kukkunersiuisumanit qallunaat oqartussaasui isumasioqatigereerlugit, allakkiamik nassinneqarsimasoq, tassani allassimalluni inatsit naapertorlugu aningaaserivimmi nutaami akileraarutitigut ilanngaateqartoqarsinnaanngitsoq, aningaaserivitoqqamit pisunik.

Allagaatit aamma takutippaat Súni Schwartz Jacobsenip Eik Bankimilu aningaasanut pisortap Ole Guldborg Nielsenip, TAKS taamaallaat aperisimagaat aningaasat qanoq isilluni ilanngaatigineqassanersut. TAKS-imut allakkani 2013-imi juunip 24-ianneersumi oqaatigineqanngilaq siulersuisut qularisimaneraat annaasat ilumut ilanngaatigineqarsinnaanersut.

TAKS akuersivoq

Pisimasoq ukioq manna februaarimi saqqummiunneqarpoq, tamatumanilu uppernarsarneqarpoq TAKS-ip Eik akuerisimagaa 500 millioner koruuninik nalikilliliisinnaasoq akileraaruteqaataasussanut iluaqutissatut taasanik, tassa ukiut qulit ingerlaneranni nalikilliliinertut. Nalikilliliineq 90 millioner koruuninik naleqarpoq.

Tunuarpoq

Jørn Astrup Hansen siulersuisunit tunuarpoq 2015-imut naatsorsuutit atsiorumannginnamigit. Aamma kukkunersiuisup avataaneersup KPMG-p ilanngaatit akueriumasimanngilai, allagaatini nutaarsiassaqartitsiviup pissarsiarisimasaani allassimavoq.

Isumaqataanngitsoq eqqunnginnerarpaa

Eikip TAKS qinnuigisimavaa pisimasoq misissoqqeqqullugu. Súni Schwartz Jacobsen savalimmiut tv-annut oqarpoq pisimasup ingerlarnga tamaat siulersuisut paasissutissinneqartarsimasut, aningaaserivimmilu qullersat isumaqatigigaat annaasat akileraarutitigut ilanngaatigineqarsinnaasut. Aamma eqqunnginnerarpaa kukkunersiuisup isumaqatigisimanngikkaa nalikilliliisoqarsinnaasoq akileraaruteqaataasussanut iluaqutissatut.

– Kukkunersiuisulli isumaqatiginngilaa akileraaruteqaataasussanut iluaqutissat qanoq isilluni aningaasanngortinneqarsinnaanersut. Taanna isumaqarpoq 90 millioner koruuninik ilanngaateqartoqarsinnaasoq, annikinnerusunilli ilanngaateqartoqarsinnaasoq, Súni Schwartz Jacobsen oqarpoq, erseqqinnerusumilli oqaatiginagu ilanngaatissat qanoq amerlatigissanersut.