Akerliussutsimik takutitsineq

Akerliusut: Knud Kristiansen, tunuarit

Kujataani angallassinermut kiffartuussinissamut isumaqatigiissutit nutaat pillugit akerliussutsimik takutitsisoqaqqissaaq. Akerliusut maanna attaveqarnermut naalakkersuisoq tunuaqqullugu kajumissaarpaat

Knud Kristiansen naalakkersuisutut tunuaqqullugu akerliusunut ataqatigiissarisup Monica Dorphip kajumissaarpaa

Kujataani angallannermut kiffartuussinissamut isumaqatigiissutinut nutaanut sisamanngorpat akerliussutsimik takutitsisoqaqqinniarpoq.

Tassani akerliusut ineqarnermut, sanaartornermut attaveqarnermullu naalakkersuisoq Knud Kristiansen (A), kiffartuussinissamut isumaqatigiissutinik pitsaanerusunik katiterisinnaanngippat tunuaqqullugu kajumissaarniarpaat.

Atuaruk: Tusagassiorfik: Kiffartuussinermut isumaqatigiissutit suli atsiorneqanngillat

Naalakkersuisoq salluvoq
Qaqortumi akerliusunut ataqatigiissaarisoq Monica Dorph, kiffartuussinissamut isumaqatigiissutit nutaat naammaginngilluinnarpai, Knud Kristiansenilu Kujataanukarluni isumaqatigiissutit nassuiariartornianngimmagit paasisinnaanngilaa.

- Kujataani angalaneq pitsaanerulerlunilu akikinnerulissasoq, Knud Kristiansenip neriorsuutigereerpaa, kisianni killormoortuanik pisoqarpoq. Taamaammat kiffartuussinissamut isumaqatigiissutit atorunnaarsinneqarnissaat kajumissaarutigaarput, taanna akerliusut sinnerlugit allappoq.

Atuaruk: Kommunimi politikeri Naalakkersuisunut tatiginnikkunnaartoq

Tamatuma saniatigut Monica Dorphip oqaatigaa, Kujataani angallannerup pitsaanerulernissaa oqaatigalugu, Knud Kristiansen innuttaasunut sallusimasoq.

- Sooruna kiffartuussinissamut isumaqatigiissutit nassuiaatigiartorlugit Knud Kristiansen Kujataanukarnianngitsoq? Sooq ukiumut tallimariarluni Upernavimmut inunngorfiminukartassava? Isumaqatigiissutit nutaat uagutsinnut nassuiarnissai qunugaa, Monica Dorph oqarpoq.

Naggataanut sukataarniartut
Monica Dorphip ilisimatitsissutigaa, sisamanngorpat akerliussutsimik takutitsisoqassasoq, tassanilu atsiornernik katersisoqassaasoq.

- Naalakkersuisullu isumaqarsimassagunik nipangiinnarluta assagut paarlallugit ajorseriaaterpassuit akuersaassagigut, kukkorujussuarput. Naggataa tikillugu sukataassaagut, akerliusut oqariartuuteqarput.

Akerliussutsimik takutitsineq aqagu sisamanngornermi, nalunaaqutaq 16.30 pissaaq.

Powered by Labrador CMS