Akerliussutsimik takutitsiniartut Naalakkersuisunut oqqassaariniarput

Facebook-imi gruppi 'Demonstration imod Naalakkersuisut - Naalakkersuisunut akerliussutsimik takutitsineq' Naalakkersuisunut ukioq-manna siusinnerusukkut akerliussutsimik takutitsinermik aaqqissuereernikoq aqagu marlunngornermi akerliussutsimik takutitsinissamut aaqqissuusseqqippoq. Akerliussutsimik takutitsinissaq pilersaarusiorneqalerpoq Aleqa Hammondip nunatta karsianit akiliunneqarluni ilaquttaminut bilitsinik, hotelini unnuinernut, minibarinut kiisalu ernissami apersortinnerani Hans Egedep illuanik attartorsimanera pillugu saqqummiussisoqareersorlu.

Akerliussutsimik takutsisut Naalakkersuisunut oqqassaariniarput
Akerliussutsimik takutitsinissamik aaqqissuisut najoqqutaralugit akerliussutsimik takutsisut Naalakkersuisunut oqqassaariniarput. Akerliussutsimik takutitsisussat oqaaseqartussaat, Giiti Tittussen, Inatsisartut ataatsimiittarfiata silataani ilaatigut oqalugiassaaq qinersisoqarnissaanullu piumasaqarluni atsiortitsinermik katersukkat aamma tunniutissallugit.

- Arlaannik pisoqartussaavoq Naalakkersuisunut oqqassaarinermut tunngasumik. Giiti Tittussen Inatsisartut ataatsimiittarfiata silataani oqalugiartussaavoq, Facebook-imi gruppi tusagassiuutinut nalunaarummini ilaatigut taama allappoq.

Aamma atuaruk: Facebookimi gruppi aammaarluni qinersisitseqquvoq

Assit takukkit Naalakkersuisunut januaarimi akerliussutsimik takutsinermeersut

Qinersisoqarnissaanut atsiornermik katersat 800-t
Facebook-imi gruppip qinersisoqarnissaanik piumasaqarluni atsiornernik katersineq Nutaamik qinersisa/Udskriv nyt valg! arfininngormat ammarpaa. Nalunaaquttallu akunnerisa 24-t ingerlanerani atsiornerit 650-it katersorneqarsimapput.

- 24 tiimit ingerlanerani 650-it atsiorput. Maanna 800-t sinnerlugit atsiorsimalerput. Atsiornernik katersineq ullut pingasut matuma siorna aallartipparput.

Nuummi akerliussutsimik takutitsinerup saniatigut piffissami tamatumanerpiaq Danmarkimi ilinniartut aamma akerliussutsimik takutsiniarput Nordatlantisk Bryggep saavani. Tassa Danmarkimi ualikkut nalunaaqutaq marlunut.

Aleqa Hammondip pisortat aningaasaataannik atornerluineranut allaaserisat allat uani atuakkit