Akerliussutsimik takutitsineq: Narsarsuarmiut peqataatinneqarnissartik kissaatigaat

- Nunaqarfik asasarput, perorfipput, angerlarsimaffigisarput, ukiorpassuarnilu ineriartorfigisimasarput pillugu oqartussaasut ilisimasaqaqqissaarnatik aalajangerniartut akerlilertariaqarmata. Narsarsuup siunissaa aatsaat taammak nalorninartigilerpoq. Inatsisartut mittarfissat sanaartorneqarnissaat pillugu amerlanersussteqartut akuersissappata Narsarsuaq matusariqassasoq qularutissaanngilaq.

Akerliussutsimik takutitsinermi oqalugiartoqarnerani ilaatigut oqaatigineqarpoq. Mittarfiliornissat pillugit Inatsisartut pingajussaassavaat aqagu sisamanngorpat.

Akerliussutsimut takutitsinermi Narsarsuarmiut 60-it missaanniittut peqataapput. Innuttaasut arlaqartut sulinertik pissutigalugu peqataasinnaasimanngitsut ilisimatitsissutigineqarpoq.

- Ulloq manna tikillugu inatsisissaq uatsinnut pingaaruteqarluinnartoq tikilluta oqallisigineqarnikuunngilaq. Tamannalu nunaqqatigiiusugut tupinnanngitsumik uippakajaarnartutut alianartutullu isigaarput. Naak Inatsisartut oqallinneranni tusareeraluaripput, Narsarsuup aamma Kangerlussuup matunissaannut 30 mio. kr.-nit immikkoortinneqarsimasut.

- Naalakkersuisut Siulittaasuat – Kissaatigaarput Narsarsuarmi innuttaasut ataqqinnittumik pineqassasut. Kissaatigaarput maani inuit ataqqineqarlutik torersumik peqataatinneqassasut. Kissaatigaarput meeqqat, inuusuttut, ilami tamavitta aamma Naalakkersuisuniit ataqqineqarluta siunissarput qanoq ittuunersoq nassuiaanneqassalluta. Kissaatigaarput Narsarsuarmi inuit aamma nunatta inuisulli allatuulli pineqassasut. Inuppalaartumik oqartussaaqataatitsisumillu nunarput aqunneqartariaqarpoq, oqalugiaammi ilaatigut oqaatigineqarpoq.