Aka Hansen: Piorsarsimassuseq politikerinit soqutigineqanngippallaaqaaq

Aka Hansenimut ippassaq pingasunngornermi ulloq nuannaarfiuvoq. Filmiliornermimi ilinniarfimmi Super16-imi aqutsisutummi inaarutaasumik suliaminik 'Blåt Lys'-imik takutitsilluni ilinniakkaminik naammassinnippoq.

Danmarkimi ukiuni tallimani najugaqareerluni maanna Kalaallit Nunaannut angerlartussanngorpoq. Angerlarnerminilu politikerinut ersarilluinnartumik oqariartuuteqarumavoq.

- Piorsarsimassuseq innuttaasunit soqutigineqartorujussuuvoq. Inuiaqatigiit piorsarsimassuseq pillugu sulianik ujartuipput. Piorsarsimassusermilli suliaqartut politikerinit illersorneqannginnerujussuat takusinnaallugu artornartutut taasariaqarpara, Aka Hansen Sermitsiaq.AG-mut oqarpoq.

Kalaallit Nunaanni filmiliornermik aqutsisutut ilinniarsimasoq siulleq nunatsinnut uteruni, filmilioriartorluni angerlassanngilaq.

- Kalaallit Nunaanni najugaqarluni filmiliortuuniarneq ilungersunartorujussuuvoq, politikerimmi piorsarsimassutsimut tunngasunik soqutigisaqanngillat.

Aka Hansen NAPA-mi piorsarsimassuseq pillugu Nuuk Nordikkimi pisoqartussaatillugu ataqatigiissaarisutut atorfinippoq. Atorfigiligassamini piorsarsimassuseq pillugu suli suliaqassaaq, ataqatigiissaarinermi, aningaasanik ujartuinermini pilersaarusiorlunilu sulinermini filmiliornermi aqutsisutut ilinniarsimasani suli atussallugit.

- Uteqqinnissara pilersaarutaajuaannarsimavoq, suliffissaqanngikkumali uteqqikkusussimanngilanga, Aka Hansen oqarpoq.

Isiginnaagassiaq akeqanngitsumik suliarineqartoq

Pipaluk Kreutzmann Jørgensenip isiginnaagassiani 'Anori' septembarimi takuteqqaarpaa. Isiginnaagassiap aningaasalerneqarnissaa pillugu sulerulussimavoq, aqutsisutullu atugassarititaasut europami filmiliornermik aqutsisunit naammagineqanngilluinnarsimasinnaagaluartut naammagalugit atorsinnaasimagamigit, isiginnaagassiani naammassisinnaasimallugu.

Marc Fussing Rosbach ukiup siuliani isiginnaagassiamik takorluuerpalaartumik, 'Akornatsinniittut - Tarratta Nunaanni'-mik suliaqarpoq, taanna ilaquttaminit taperneqarluni namminiivilluni isiginnaagassiorsimavoq – oqaluttualiorluni, immiussilluni, katiterilluni filmiliornermilu immikkut sunniutinik suliaqarsimalluni.

- Kalaallit Nunaanni piorsarsimassutsimik suliaqartut ataqqilluinnarpakka, aningaasaliissutimmi annikitsuinnaat pagganniartariaqartarpagut, Aka Hansen oqarpoq.

Aka Hansen ilanngullugu oqaluttuarpoq taamaalluni isiginnaagassiorniarumaarluni – unitsiinnavissinnaannginnamiummi. Atugassarititalli naammaginanngikkaluarpataluunniit taama sulerusuppoq.

- Politikerip ataasiinnaalluunniit piorsarsimassuseq pillugu suliniuteqassalluni aallarnisaassalluniluunniit qineqqusaarnerni oqartannginnera, assut annernarpoq.

- Kalaallit Nunaanni ukiuni qulini kingullerni filmiliornermik suliaqartarsimaninni aningaasaliissutit amerliartoruusaarsimagaluartut, taamaattoq isiginnaagassiamut ataasiinnarmulluunniit suli naammanngillat. Pimoorunneqalinngippat taama suliaqarneq oqimaattuaannassaaq.

Aka Hansenip inuit Danmarkimi najugallit pillugit piviusulersaarutai, KNR juulleriartornerani aallakaatissavai.