Flyulykke i Nuuk
Ajutoorsimanermut misissuisut: Taamaattumik Air Iceland ajutoorpoq
Timmisartortartut kukkunerannik pissuteqartumik Air Icelandip timmisartua Dash 8 2011-mi Nuummi ajutoorpoq. Timmisartut ajutoornerinik misissuisartut inaarutaasumik nalunaarusiaminni taama allapput
Air Icelandip timmisartua Dash 8 2011-mi martsip sisamaani Nuummut minnermini ajutoorpoq. Timmisartut ajutoornerinik misissuisartut inaarutaasumik nalunaarusiaminni allapput timmisartortartut kukkunerannik tamanna pissuteqartoq.
Timmisartoq Nuummut tikisartorpoq martsip sisamaat 2011 silarluttoq. Timmisartortartut minniarlutik aalajangerput naak Nuup mittarfianni najoqqutassiat malillugit minnissaq inerteqqutaagaluartoq. Tamanna sakkortuumik kinguneqarpoq timmisartoq minnermini sisoormat innaaqqinneq qanillillugulu unilluni. Ilaasut 31-it inuttallu pingasut ajoqusinngillat. Taamaattoq timmisartortartut isornartorsiorneqarput.
- Ilimanarpoq timmisartortartut nakkutigisassaqarpallaarsimasut aammalu paasissutissat amerlavallaat nalilersortariaqarsimallugit, timmisartut ajutoornerannik misissuisartut nalunaarusiaminni allapput.
Timmisartoq sakkortuumik mippoq talerpiup tungaanut uingavallaarluni, taamaattumik assaasulerfia talerperleq isavoq taamalu timmisartoq ajutoorluni.
Air Icelandimi timmisartortartut qullersaat ajutoornerup kingorna timmisartuni naalakkanut naalakkiuteqarpoq Nuup mittarfianut mittarfinnullu allanut minnissamut malittarisassat maleqqissaarlugit mikkiartortoqartassasoq.