Ajugaaneq soqutaanngitsoq: Isertitaq ataaseq semifinaalernissamut amigaatigineqartoq

Naak unammineq aallartimmat unammisut pissangagaluartut, GOG Århus Håndboldimut unamminermi ajugaapput. Unamminerup aallartinnerani GOG 0-3-mik kinguaraluarput, sivitunngitsorli 8-4-mik siuarlutik. Muminnermi 14-8-mik siuaqqallutik. GOG unamminerup ingerlanerani arsarluarnerujartuinnavipput. Ungasianiit isertitsinerit. Illersuilluarneq. Sukkasuumik saassusseriataarnerit, kiisalu målmandi Kevin Møller unammilluarluni. Ukiamut unammiffiusoq aallarteqqippat Kevin Møller GOG-mi unammisartuujunnaarsimassaaq, aasamummi Tysklandimut Flensborg-Handewittimut unammisartunngussagami. Tysklandimi unammisartuunissaa neriuutigineqarluarpoq.

Naak unamminerup naajartulernerani unamminerat pissanganarunnaareersoq, Århus Håndboldilu qanillattoraluartoq unammineq pissanganarsinngilaq. Minik Dahl Høegh unammisut 25-21-ertillugit isertitsimmat unammineq matuaa, GOG-lu naggataatigut 26-22-mik ajugaallutik.

Ajugaanerli soqutaanngilaq
GOG-ip unamminerani pissanganarpianngitsoq naammassimmat allat unamminerat pissanngatigineqarnerulerpoq. GOG semifinaalissappat Team Tvis Holstebro Skjernimut pointinnattariaqarpoq. Unammisut aallarteqatigiikkaluarput. GOG-ip unamminera naammassimmat unammisut aappaat minutsini qulini suli unammisussaapput. Gudmemi isiginnaartut Skjernimi unammisut malinnaaffigaat. Team Tvis Holstebro isertitsigaangat GOG-ip isiginnaartui nuannaarlutik nilliasarput, tassami naligiiginnassappata GOG semifinaalimut anngutissammata. Ajoraluartumilli taamaattoqanngilaq. Nunanut allanut unammisartup Kasper Søndergaardip Skjern ajugaatippai 29-28-mik, taamatullu unamminerup naammassineqarnera Gudmemi pakatsissutigineqarpoq.

Minik arfinileraartoq
Minik Dahl Høegh unammilluaqqippoq pingaarutilinnik isertitsisarluni. Periarfissaaleraangat isertitsisarpoq. Poorskip aappaani arfinileriaq unamminermi isertitsilluni. Akutaaneq Kreutzmann unamminermut isinngilaq. Århus Håndboldimi unammisartoq Aqqaluk Sørensen aamma unamminermut isinngilaq. Seeqqukkut ajoqqusereernermi kingorna Aqqaluk Sørensen suli unammeqataanissamut piareersimanngilaq.

Sungiusaasoq tulluusimaarpoq
- Maannakkut soorunami pakatsivugut. Isertitaq ataaseq semifinaalernissatsinnut atorfissaqartiinnaraluarparput. Team Tvis Holstebro Skjern Håndboldilu semifinaalertussanngorput. Qulingiluanik pointeqarluta naammassivugut. Ukiumi unammisaqattaarfiusumi allat angusarissaarnerat pissutaalluni semifinaalimut anngupput, Jakob Larsen Sermitsiaq.AG-mut oqarpoq.

- Ukioq unammiffiusoq assut pitsaasumik ingerlapparput. Naak timersoqatigiiffinnit allanit aningaasaatikinnerugaluarluta tupaallatitseqattaarpugut, GOG-ilu pikkorinnernut akuuteqqilerlugu. Pokaalinnanniunnermi tallimanngorpat naggammik ukioq manna unammiffiusumi unammissaagut. Sapaatip akunneri marluk assammik arsarnermit qasuersaalaariarluta aappaagumut unammiffiusussamut piareersalissalluta.

Assit ataani takukkit