ajornartoornermi radio
Ajornartoornermi radio millionilikkaanik aningaasaliiffigineqartoq
Kalaallit Nunaanni piniartut, aalisartut aamma sunngiffimmi angalaartartut ajutuussagaluarunik ikiortissarsiorsinnaasariaqarput. Aamma siunissami. Aningaasarpassuit ajornartoornermi radiomut imaatigut angalatillutik isumannaatsuuneq annertooq suli qulakkiissavaat.
Tamanna danskit Nukissiuuteqarnermut, Pilersuinermut Silallu pissusianut ministeriata Lars Chr. Lilleholtip tusagassiuutinut nalunaarutaani atuarneqarsinnaavoq.
Danskit naalakkersuisuisa ukiuni qulini tulliuttuni Kalaallit Nunaata imartaani ajornartoornermi radiuanut aserfallatsaaliinermut pitsanngorsaanermullu 62 millionit koruunit atorniarlugit aalajangiuppaat. Kalaallit Nunaanni ajornartoornermut radiumut piffissami 2018-imiit 2027-imut missingersuutit 414 millionit koruuninut qaqisippaat, tamanna tusagassiuutinut nalunaarummi atuarneqarsinnaavoq.
- Imaani isumannaatsuunerup qaffasinnissaa pingaaruteqarpoq. Qujanartumik qaqutigut umiusoqartarpoq, kisianni taamaattoqaraanga ajornartoornermi radioqarneq pingaaruteqarpoq, inuunermillu annaassisinnaalluni, ministeri Lars Chr. Lilleholt oqarpoq.
Aningaasaqarnikkut sinaakkutit annertusineqartut
Kalaallit Nunaanni ajornartoornermi radioqarnerup Kalaallit Nunaata imartaani angallavigineqarnerpaat attaveqartippai, ilaatigullu 40-nik sakkortusaaveqarluni aamma ulloq unnuarlu ajornartoornermi nalunaarutinik tusarnaarfiusunik radioqarfeqarluni. Kalaallit Nunaanni ajornartoornermi radiomik akeqanngitsumik atuisoqarsinnaanera danskit naalagaaffiata akisussaaffigaa, aningaasaliinerillu nutaat piffissamut 2018-2027-imut qulakkeerinnipput. Ukiuni tulliuttuni atortut amerlanerpaartaat taarsersorneqassapput.
- Ajornartoornermi radiomut missingersuutit qaffanneqarnerisa iliuatsinnerat naammagisimaarpara. Isumannaatsuuneq atortunik patajaatsunik ukiorpassuarni attatiinnarsinnaaneranik tamanna isumaqarpoq, Lars Chr. Lilleholt oqarpoq.