Air Greenland: Kaaviiaartitat annikitsumik ikilerialaaginnartut

Kiffartuussinermut isumaqatigiissutit annaaneqaraluartut, 2017-imi Air Greenlandip kaaviiaartitai 1,3 millionit koruuninik apparialaaginnarput.

Air Greenlandip siulersuisuini siulittaasoq, Søren Lennert Mortensen, timmisartortitseqatigiiffik ukioq ataaseq unammillernartoqaraluartoq angusarissaartoq oqaluttuarpoq.

Air Greenlandip pisortaanerata Jacob Nitter Sørensenip 2017-imi ukiumut naatorsuutit saqqummiuppai, tamatuma takutippaa timmisartortitseqatigiiffik 1,3 milliardit koruuninik kaaviiaartitaqartoq.

Kiffartuussinermut isumaqatigiissutit annaaneqaraluartut, kaaviiaartitat taamaallaat 1,3 millionit koruuninik ikileriarsimasut, timmisartortitseqatigiiffiup tusagassiuutinut nalunaarummi ilisimatitsissutigaa.

Air Greenlandip ukiut arlallit ingerlanerini takornariaqarnerup iluani annertusititsinissamik aallussinerata, kiisalu amerlanerusut angalanissamut kajumissaarniarlugit akinik appartitsinerata tamanna inerneraa.

Air Greenlandip nalunaarutaa naapertorlugu, Air Greenlandip ukiut arlallit ingerlanerini takornariaqarnerup iluani annertusititsinissamik aallussinerata, kiisalu amerlanerusut angalanissamut kajumissaarniarlugit akinik appartitsinerata tamanna inerneraa.

- Ukioq unammilligassanik arlalinnik naammattuuiffiusimagaluartoq Air Greenland 2017-imi angusaqarluarpoq. Tanamma sulisorpassuit aallussilluarlutik sulinerisa inerneraa, aammalu suliniuteqarnissap aallunneqarnera kinguneqartoq takullugu nuannerpoq, siulersuisut siulittaasuat Søren Lennert Mortensen oqaluttuarpoq.

Aqqutini unammillerfiusuni siuariarneq

2017-imi Air Greenland angallavinni unammilleqatigiiffiusuni, nunanut allanut angallaviusuni tamani 6 procentinik siuariarpoq. Siuariaatit 73 procentii Kangerlussuup aamma Københavnip akornanni aallartarnernit pisuupput, siuaariaatillu 27 procentii Kalaallit Nunaata aamma Islandip akornanni angallavinnit pisuullutik.

- 2017-imi Kalaallit Nunaata Islandillu akornanni ukioq kaajallallugu timmisartuussisarneq aallartiparput, tamatumalu peqatigisaanik timmisartuussisarnerit amerlillugit. Islandimi niuerfik ataatsimut isigalugu appariarfiugaluartoq tamanna pitsaasuuvoq, Søren Lennert Mortensen nangippoq.

Issiaviit kilometerimut tunisat amerlanerusimasut

2017-imi kiffartuussinissamut isumaqatigiissutinik annaasaqartoqaraluartoq akinik appaaniarluni suliat ingerlaqqipput, Air Greenland ilisimatitsivoq, pisortaaneq Jacob Nitter Sørensen oqaluttuarpoq.

- 2017-imi kaaviiaartitagut ilaasullu amerlassutsimikkut ikilerialaarput, taakkuli kiffartuussinissamut isumaqatigiissutinut annaasatsitut amerlatiginngillat. Tamatuma peqatigisaanik issiaviit kilometerimut tunisagut amerlanerusimasut aammalu angallaviit isorartussusaat agguaqatigiissillugit annertusisimasut takusinnaavarput. Sullitanik nutaanik pileritsatsitsisimasinnaasugut, sullitallu taakku isorartunerusumut angalasarsimasut tamatumani uatsinnut takutinneqarpoq – tamanna 2017-imi naammaginartumik angusaqarnissamut qulakkeerisimavoq.

2018-imi siunissami annertusititseqqinnissaq tapersiiffiginiarlugu tunisassiat amerlineqassapput. Aamma attartortitsilluni angallassineq oqaluttuarisaaneq eqqarsaatigalugu angusaqarfiulluarpoq, suliallu 2018-imi ikilinnginnissaat naatsorsuutigineqarpoq.

Powered by Labrador CMS