Air Greenlandip takornarissat kingulliukkai

2016-imi kaaviiaartitat 1.307 mio. koruuniupput, tamannalu ukiup siulianut sanilliullugu 82 mio. koruuninik qaffariaateqarfiuvoq.

Kaaviaartitat qaffanneranut ilaasorisimasat amerlisimanerannut pissutaavoq.

”2016-i suliffeqarfimmut ukiuuvoq angusarissaarfiusoq, ilaasut amerlassusiat ukioq kaajallallugu 8 %-imik amerleriaateqarfiulluni, siulersuisuni siulittaasoq, Søren Lennert Mortensen, ippassaq ataatsimeersuareernerup kingorna tusagassiuutinunt nalunaaruteqarpoq.

Aasaaneranilu Atlantikoq qulaallugu angalanerit timmisartortitseqatigiiffiup iluaqutigilluarsimavaa.

- Tamatuma saniatigut ukioq kingulleq juulimi ilaasut amerlassusiisigut rekortiliivugut, ilaasut 20.000-it sinnillit Atlantikoq qulaallugu timmisartuussinermi ilaasorisimagatsigit, siulersuisut siulittaasuat oqarpoq.

Annikillisaanerit

Suliffeqarfiup ukiumut angusai akileraarutit ilanngaatigitinnagit, aamma suliffeqarfiup Airbus 330-200-utaata nalingata immikkut ittumik nalikillilerneqarnera sioqqullugu 110,8 mio. koruuniupput.

Suliffeqarfiulli Airbus 330-200-utimi nalingata immikkut ittumik 2016-imi 70 mio.koruuninik appartinneqarnissaa aalajangiuppaa, tamatumalu kingunerisaanik akileraarutit ilanngaatigitinnagit ukiumut angusat 40,8 mio. koruuninngorlutik. Timmisartup niuerfimmi nalikinnerulernerata kingunerisaanik nalikilliliineq pivoq.

Unnuiffissat ikippallaartut

Angusalli siulersuisunit iluarisimaarneqarput.

2016-imi siuariartorneq 2017-imi nangittumik ingerlaqqippoq, ukiorlu manna angallaffiunerpaami piumaneqarneq ajunngitsumik ingerlavoq.

Angallaffiunerpaamilu takornarissat amerlavallaangajapput. Air Greelandillu piginneqatigiiffiutigisaani unnuiffissanik naammattunik tunniussisinnaannginneq pissutigalugu takornarissat angalarusuttut tunulliuttariaqartarsimavaat.