hov!
Air Greenlandip siulersuisuni toqqaaneq peqqissimissutigaa
Air Greenlandip siulersuisunik nutaanik toqqaanerup kinguninngua timmisartortartoq selskabip siulittuaasuata tulliatut toqqagaagaluartoq tunuartiinarpaa
Air Greenlandimi timmisartunut billetsinik tunisinikkut kikkut aningaasarsiortarpat?
Tassapput namminersorlutik oqartussat, qallunaat naalagaaffiat timmisartortitseqatigiiffillu SAS, tamarmik selskabimi aktianik tamanik piginnittuusut. Taamaattumik naalagaaffiup, aamma SAS-imik piginneqataasup, ukiorpassuarni Air Greenlandip siulersuisuini siulittaasup tulliatut atorfik tigummisimavaa.
Tamannalu ingerlaannassaaq, selskabip ullumi siulersuisuni nikisitsineq tamanut saqqummiummagu.
Timmisartortartoq qaffatsikkaat
Tamanna pivoq apriilip 25-ianni ataatsimeersuarnermi Air Greenlandimi siulersuisut nutaat toqqarneqarnerisa kinguninngua.
Ataatsimeersuarnermi siulittaasup tulliatut toqqarneqaraluarpoq sulisut siulersuisuni ilaasortatut toqqagaat Henrik Steinbacher, taannalu timmisartortartuuvoq Nuummi najugalik.
Ullumikkulli timmisartortitseqatigiiffiup tamanut nalunaarutigaa siulersuisut isumartik allanngortissimagaat, Aalborg Havnimilu pisortaq Claus Holstein siulittaasup tulliatut ivertillugu. Holstein naalagaaffik sinnerlugu Air Greenlandip siulersuisuinut ilaasortaavoq.
Sulisut toqqagaannik toqqaaneq nalinginnaasuunngilaq
Sermitsiaq.AG-p siulersuisut siulittaasuat Søren Lennert Mortensen oqaloqatigaa.
Sooq siulersuisut maanna allanngorteriataarpisigit?
– Siulersuisuni nutaamik ataatsimiissimavugut tassaniliu allanngortiterpugut.
– Ilami nalinginnaasuunngilaq sulisut toqqagaannik siulittaasumut tullinngortitsisarneq. Taamaattumik nutaamik ataatsimiippugut, tassanilu siulersuisut isumaqatigiillutik taamatut aalajangerput.
Soormi taamaasiorpisi, apriilimi isumaqatigiissutigereerlugu siulersuisut allaanerulluinnartumik isikkoqalissasut?
– Ila siulersuisut ataatsimiinnerannit issuaasinnaanngilanga. Taamaasioqqusaanngilanga.
Taamaatut nutaamik taarsiivisi, pissutigalugu selskabit allat allaanerusumik iliormata?
– Aap tamanna sunniuteqartorujussuuvoq. Tamannali pillugu annertunerusumik oqaaseqarsinnaanngilanga, siulersuisut siulittaasuat Søren Lennert Mortensen naggasiivoq.