luftfart
Air Greenlandip pisortamik naleqquttumik nassaarnissaq ajornakusoortippaa
Qinnuteqarfissatut killiliunneqartoq juunip naalerneranut killeqarpoq. Kisianni atorfimmut qinnuteqartut amerlagaluaqisut naleqquttumik toqqagassaqanngilaq, siulersuisut taama naliliipput. Atorfik inuttassarsiuuteqqillugu maanna misiliipput
Michael Højgaardip Air Greenlandimi pisortatut siorna maajimi tunuartup taartissaanik nassaarniarneq ajornakusooqisoq paasinarsivoq, AG taama allaaserisaqarpoq.
Tulluartoqanngitsoq
Taamaalillunimi suliffeqarfiup siulersuisui atorfimmut inuttassarsiuussamut aasaleqqaarnerani inuttassarsiorneqalersumut qinnuteqarfissatut juunip 28-annut killeqartumut qinnuteqartut akornanni atorfinitsitsinissartik taamaatiinnarpaat. Suliffeqarfiup atorfinittussarsiornermik suliaqartartup piukkussat akornanni toqqagassanngortitai arlaannaalluunniit naammaginartumik piginnaaneqanngilaq.
- Suliamik suli ingerlatsivugut. Atorfimmut qinnuteqartunik qassinik tigusaqarnerluta ilisimatitsissutigisinnaanngilara, arlalissuuppulli. Qinnuteqartut amerlaaloqaat, atorfilli pisariusuuvoq taamaattumillu inummik tamatigoortumik aamma ujaasivugut. Takorluukkatsinnit tamanna maannamut ajornakusoornerulaarpoq, siulersuisut siulittaasuat Søren Lennert Mortensen oqarpoq.
- Kingullermik inuttassarsiuussigatta, tassa Michael Højgaardip atorfinitsinneqarneranik kinguneqartumi, suliap ingerlanneqarnera aamma ilungersunartuuvoq. Naggataagulli iluatsipparput aamma maanna iluatsissinnaassallugu naatsorsuutigaarput, taanna oqarpoq.
Ilisimasaqarluartumik ujaasisut
Atorfimmut inuttassarsiuunneqartumut piumasaqaatit naapertorlugit pisortanngortussaq aningaasarsiornermut aamma niuernermut tunngasunik piginnaasaqartussaavoq, silaannakkut angallannermut ilisimasaqarluartuussalluni aamma politikimut misissueqqissaarnermullu piginnaaneqassalluni.
- Inummik pineqartunut ilisimasaqarluartumik, takornariaqarnerulernissaanik suliniuteqarnitsinnut atatillugu suliffeqarfimmik ineriartortitsisinnaasumik ujaasivugut. Inummik piginnaanernik ujartukkatsinnik tamanik piginnaanilimmik nassaarniarneq ajornakusoorsimaqaaq. Tamatigoortumik kissaatigisatsitut ittumik nassaanngitsoorpugut, Søren Lennert Mortensen oqarpoq.
Allaaserisaq tamaat AG-mi atuaruk, uani digitaliusumik akiliillutit linki ataaniittoq atorlugu atuarsinnaavat: