Angallanneq
Air Greenlandip kujataani illoqarfinni ilaasunik angallassinera kingulleq
Kujataani Air Greenlandip ilaasunik angallassisarnera oqaluttuaannangnorpoq. Disko Linep kujataani illoqarfiit nunaqarfiillu akornanni ilaasunik angallassineq ataasinngorpamiit akisussaaffigilissavaa
Tallimanngormat ulloq oqaluttuarisaanermut ilannguppoq, tassani Air Greenland ukiuni qulikkaani arlalinni ilaasunik qulimiguulimmik angallassisareerluni, kujataani illoqarfiit nunaqarfiillu akornanni naggataamik angallassivoq.
Narsallu heliportiani ulapputtoqarpoq. Juullikkunni Narsamit utimullu angalasorpassuit ukiup nutaap aallartinnginnerani angerlarniarlutik aalajangersimapput, januaarimit angallassineq qularigamikku, aammalu taamani bilitsitik pisiarigamikkit Disko Linemut pisisinnaasimannginnertik pissutigalugu.
Illoqarfiullu innuttaasuinut kiffartuussinermut isumaqatigiissutit nutaat pillugit isummat avissaartuuttupilussuupput. Ilaasa, ingammik utoqqaanerusut soraarnerussutisiallit umiarsuarsinnaalerneq pitsaasutut isumaqarfigaat, bilitsit akikinnerulertussaanerat pissutigalugu, taamaalillutillu ilaquttatik illoqarfinni allaniittut tikeraarsinnaalissagamikkit.
Allat qiimmatsappallaanngillat, Narsarsuup mittarfiani aamma kujataaani illoqarfiit allat akornanni kinguaattoornermi aallanngitsoornermiluunniit saniatigut aningaasartuutissat suunersut qularigamikkit.
Kujataamiullu allat aamma ineriartorneq ukiunik 50-inik utertinneqartoq isumaqarput, taamani KGH-p ilaasortaatigisimasaa, Taateraaq, Narsarsuarmit Narsamut, Qaqortumut aamma Nanortalimmut utimullu angallassisarallarneratut ililluni.
Narsap heliportiani aamma allannguisoqarpoq. Air Greenlandimi sulisunit pingasuusunit marlunk Mittarfeqarfinni sulilerput, kingullerlu soraarninngorpoq.