juullimi angallanneq

Air Greenlandip juullilernerani angallatsitsinissai

Air Greenland Qeqertarsuup Tunuani angallammik attartorpoq, juullertinnagu ilaasut sumunngarfiinut apuunniarumallugit. Air Greenlandip nuna tamakkerlugu juullilernerani angallatsitsinissai takukkit

Assi toqqorsivimmit

Air Greenlandip helikopteriata Qeqertarsuup Tunuani timmisartuussisartup teknikkikkut ajoquteqarnera pissutigalugu Air Greenlandimut ilaasut 60-it angullugit amerlassusillit sapaatip akunnerani uani Ilulissanit Aasianniillu aallarnaveeqqasimapput.

Air Greenland maanna angallammik attartorsimavoq juullertinnagu ilaasut sumunngarfiinut apuunniarumallugit. Timmisartortitseqatigiiffik tusagassiorfinnut taamatut nalunaaruteqarpoq.

Air Greenlandip juullilernerani angallassinissai aajuku:

Uummannaq

Ilaasut Illorsuarnukartut 12-it utaqqipput, ilaasut qulingiluat sapaatip akunnerata naanerani decembarip 20-anni 21-annilu timmisartuunneqassapput. Ilaasut sinneri pingasut marlunngornermi decembarip 23-anni timmisartuunneqassapput.

Qeqertarsuup Tunua

Pilersaarutaavoq sapaatip akunnerata naanerani ataasinngornermilu ilaasut Qeqertarsuup Tunuani kinguaattoorsimasut angallammik helikopterimillu assartorneqassasut. Silali suli apeqqutaasassaaq, tallimanngormallu anagallat attartugaq Saqqamukartoq mallerpallaarnera pissutigalugu utiinnartariaqarsimavoq.

Tunu

Sapaatip akunnerata naanerani perserluni anorersuarnera pissutigalugu Nerlerit Inaannut timmisartuussinissaq ajornartorsiorfiusimavoq. Taamaattumik ataasinngorpat decembarip 22-anni Nuummit Kulusuk aqqusaarlugu Nerlerit Inaannut timmisartuussisoqassaaq. Ilaasut 15-it Nuummit Nerlerit Innaannukaanneqassapput, ilaasullu pingasut Kulusummit Nerlerit Inaaliaanneqassallutik. Nerlerit Inaannit ilaasut pingasut Danmarkiliartussaapput, ilaasullu pingasut Nuummukartussaallutik.

Danmarkimukartussat Keflavikimut timmisartuunneqassapput, tassangaanniillu Danmarkimut ingerlaqqissallutik, ilaasullu sinneri Nuummut ingerlaqqissallutik.

Ilaasulli Ittoqqortoormiinukatut tamarmik ataasinngorpat tamarmik Nerlerit Inaannit Ittoqqortoormiinut anngussinnaassanngillat, tamaani ullukkut qaamanera sivikittarmat.

– Ataasiakkaat unnuisariaqarput marlunngornermilu decembarip 23-anni apuunneqassapput, Air Greenland nalunaarpoq.

Powered by Labrador CMS