Air Greenlandip atorfiit 45-t peertariaqarpai

Angallassinermi kiffartuussinissamut isumaqatigiissutit nutaat, maanna Inatsisartut aningaasaqarnermut akileraartarnermullu ataatsimiititaliaanit akuerineqaqqammersut, arlalitsigut kinguneqartitsissapput.

Isumaqatigiissutit 2017-imit atuutilertussat ukiunilu tallimani atuuttussat, umiarsuarmik angallassinerulernissamik aallutaqarnissamik kinguneqassapput, qulimiguulimmillu angallasserpiarunnaartoqassaaq.

Atuaruk: Ilaasut timmisartorlutillu umiarsuartassapput

Ukioq naallugu umiarsuarmik
Qeqertarsuup Tunuani ukioq naallugu umiarsuarmik angallassisarnissaq siunertaavoq - taakkunani ukiukkut qulimiguulimmik angallassisoqartaraluarpoq. Kujataanilu qulimiguulimmik angallassisarneq taamaatinneqavissaaq, umiarsuarmillu angallassisoqartalerluni.

Umiarsuaateqarfik Disko Line, Qeqertarsuup Tunuani maanna angallasisareersoq, Qeqertarsuup Tunuani, Nunatta Qeqqani aamma Kujataani angallavinni pisortanit aningaasaliiffigineqartuni angallassisassaaq - silap angalaffiusinnaanera apeqqutaatinneqassalluni.

Qulimiguulimmik attartortassasoq
Umiarsuaateqarfik aamma aasaanerani aalajangersimasumik minnerpaamik qulimiguulik ataaseq attartorneqartassaaq, ukiuuneranilu marluusassapput.

Air Greenland ullumikkut kiffartuussinissamik isumaqatigiissutinik tamanik angallassisuusoq, isumaqatigiissutit nutaat kingunerannik ingerlatseqatigiiffik ilaatigut Namminersorlutik Oqartussanit pigineqartoq atorfinnik 45-nik piiaasariaqassaaq, taakku amerlanerpaartaat Kujataaniipput.

Atuaruk: Kiffartuussinissamut isumaqatigiissutit maanna inissipput

Matusariaqartut
- Qaqortumi, Narsami aamma Nanortalimmi mittarfeqarfigut matusariaqassavagut. Tamannalu ilaatigut usilerisunut aamma mittarfilerisunut kinguneqartitsissaaq, taakku saniatigut aamma Nuummi atorfiit arlallit eqqorneqassapput, assersuutigalugu qulimiguulinnik suliakinnerulissagatta, Air Greenlandimi pisortaaneq Michael Højgaard ilisimatitsivoq.

Taassumali naqissuserpaa, 45-t soraarsitaanavianngitsut, tassami suliffeqarfiup sapinngisamik sulisut atorfinnut inuttaqanngitsunut allanullu nuutsinniarsarissagamigit.

Aappassaanik
Air Greenlandip Kujataani sulisunik aappassaanik soraarsitsisariaqalerpoq.

Siullermik aggustimi 2014-imi tamanna pivoq, taamani kiffartuussinissamut isumaqatigiissutit nutaat malillugit umiarsuarmik angallassisalernissaat ilimanarsimmat.

Tassani inuit 30-t soraarsinneqarput. Kisianni kingorna atorfinitseqqinneqarput.

Tassani kiffartuussinissamut isumaqatigiissutip suliarineqarnera ukiunik marlunnik kinguartinneqarmat, naalakkersuisoqatigiit politikkikkut ajornartorsiungaatsiarnerat tassani pissutaalluni, kingornalu tamanna novembarimi qinersinermik kinguneqarpoq - nutaanillu isumaqatigiissusiornissaq piviusorsiorunnaarpoq.

2 millioninik akeqartoq
Isumaqatigiissut tunngaviusoq septembarimi naammassineqartoq malillugu, timmisartortitseqatigiiffik sulisut tamaasa ukiup naanerani isumaqatigiissutit qaangiuppata soraarsissinnaanngilaat. Ilaat sivisunerusumik soraarsitaanissamik sivisunerusumik kalerriuteqaramik. Taamatullu pisoqarnera Air Greenlandimut 2 millionit koruuninik akeqartitsissaaq.

- Tamanna pisoq pitsaasuunngilaq, soorunami kiffartuussinissamut isumaqatigiissutit tamaasa pissarsiarinissaat neriuutigisimagaluarparput. Ukiut marluk matuma siorna qularisimanngikkaluarparput isumaqatigiissutip tunngavia inissinneqartoq, sulisunillu soraarsitsiortorpugut, taakkulu sulilerseqqittariaqarsimavagut. Taamatut pisoqarnera aamma inunnik sulerulutsitsisarpoq. Taamaattumik maanna soraarsitsinissamik kalerriuteqarnissarput utaqqiniarlugu aalajangerpugut, tassani kiffartuussinissamut isumaqatigiissutip isikkussaa qulakkeeqqaarniassagatsigu. Taamatulli aalajangernerput uagutsinnut aningaasartuuteqartitsissaaq, Michael Højgaard oqarpoq.

Nioqqutit marluk
Kiffartuussinissamut isumaqatigiissutini nutaani allannguut aalajangiisoq tassaassaaq, ilaasut Air Greenlandip aallannginnerani umiatsiamik apuussimanngitsut, ilaatigut nerisaqarnerminnut najugaqarnermullu timmisartup tullia utaqqinerani nammineq akiliisassapput, ilaatigullu allanngortinneqarsinnaasumik bilitseqanngikkunik taanna annaassavaat.

- Tassani ilimagereersinnaavarput angalasut ilaat eqqorneqassasut. Kisianni kiffartuussinissamut isumaqatigiissutit taama aaqqinneqarsimapput. Maannakkumit angallassisut immikkoortut ilaasunik kiffartuussilissapput. Soorunami Disko Line peqatigalugu angalanermut pilersaarutit aaqqissussavagut, kisianni kinguaattoortoqartillugu - soorlu ullumikkutut - ilaasut apuussimasut timmisartuuttariaqartassavagut, uagut angallassinermut eqqorneqannginnissaa anguniarlugu, pisortaaneq oqarpoq.

Taassuma tikkuarpaa, ullumikkut pissutsit Danmarkimit angalasunit kinguaattoortunit Air Greenlandip angalanerinut kinguaattoortunit allaanerungaanngitsut.

Air Greenlandip ullumikkut Kujataani kinguaattoornerit pissutigalugit, soorlu silap ajortillugu unnuisitsinermut nerisitsinermullu 4,5 millionit koruunit ukiumut aningaasartuutigisarpai.