Air Greenlandip aamma akinik qaffaanissani naatsorsuutigaa

KNI A/S Polaroilip aggustip aallaqqaataa aallarnerfigalugu ikummatissanik qaffaanera suliffeqarfinnut assigiinngitsunut eqquivoq.

Nukissiorfiit akinik qaffaassallutik marlunngornermi nalunaaruteqarput, tassani ikummatissanik qaffaasoqarnera pissutaalluni taama kinguneqartitsisoqarluni.

Air Greenlandimit aningaasartuutissat 15 million koruuninik qaffassasut aamma nalunaarutigineqarpoq.

KNR nalunaarpoq.

- Taannalu akitsuineq takorlooruminaappoq atuisunut sunniuteqanngitsoornissaa, tassa imaappoq akit billetinut akiutitaasut imaluunniit nassiussiniarnermut akigititaasut taakkua eqqorneqarnissaat pinngitsoorneqarsinnaassagunanngilaq, Air greenlandimi sulisoqarnermut pisortaq Mads Christensen Radioaviisimut oqarpoq.

Atassut SIK-lu isornartorsiuisut
KNI A/S Polaroil aggustip aallaqqaataa aallarnerfigalugu ikummatissanik qaffaanera Atassummit SIK-miillu isornartorsiorneqarpoq. Inuiaqatigiinnut equngasumik eqquisinnaanera ernumassutigineqarpoq, tassanimi illoqarfinni mikinerusuni kiisalu nunaqarfimmiut eqqorneqarnerpaajusussaammata.

Akit qaffanneqarmata dieseli gasuulialu 54 øremik akitsorlutik 611 koruuniniit 6,65 koruuneqalerput, benzina 39 øremik akitsorluni 6,11 koruuniniit 6,50 koruuneqalerpoq, petruuliulu 55 øremik akitsorluni liiterimut 6,21 koruuniniit 6,76 koruuneqalerpoq. Akinut ilaapput avatangiisinut akitsuut 10 øre.