Air Greenlandimut piginneqataassutsit qanoq akeqassappat?

Danskit Naalagaaffiata Air Greenlandimut piginneqataassutsini tunerusuppai. Kalaallit Nunaannut tamanna qanoq naleqassava?

Air Greenlandimut piginneqataassutsit qanoq naleqartiginerat pillugit isumaqatiginninniarnerit imaannaassanngillat. Tamanna danskit aningaasaqarnermut ministeriannit Naalakkersuisullu siulittaasuanit isumaqatiginninniutigineqartussaavoq. Tassami piginneqataassutsip nalingata nassaarineqarnissaa imaannaanngilaq.

Danskit statsministeriata Lars Løkke Rasmussenip aamma Kim Kielsenip ataasinngormat isumaqatigiissummi atsiugaanni ilaavoq, Kalaallit Nunaata Air Greenlandip piginneqataassutaa annertuseriassasoq, Naalagaaffiup piginneqataassutaa Kalaallit Nunaannut pigineqalertussanngortussaammat.

Timmisartuutileqatigiiffik immikkut ittuunera pissutaalluni aningaasarsiornermut ilisimasallip Jacob Pederseni Sydbankimeersup nalilersinnaangilaa piginneqataassuseq ataaseq qanoq naleqarnersoq.

- Air Greenland suliffeqarfinnut allanut naleqqersuunneqarsinnaanngilaq, Jacob Pedersen naqissusiivoq.

- Kisitsisit pingaarutillit ilaat naleqqersuunneqarsinnaapput, niuernikulli tungaatigut kalaallit nunaat immikkuullarissuuvoq. Ilulissani Nuummilu mittarfiliortoqartussaanera pissutaalluni suliffeqarfissuup qanoq aningaasaliiffigineqarsinnaanera aamma ineriartortitseqqissinnaanera nalilissallugu eqqoriaruminaappoq, oqarpoq.

- Air Greenlandip allannguutit qanoq iliuuseqarfigissavai. Aningaasarsiornissamut periarfissat qanoq isikkoqarpat. Timmisartut anginerusut mikinerusulluunniit atorfissaqartinneqalissappat. Piginneqataassutsip nalinga paasiniassagaanni suararpassuit naliliinermut ilaatinneqassapput, Jacob Pedersen oqarpoq.

SAS-ip nalinga qanoq inissinneqarnikuunersoq nassuiarpaa.

- Norgep Sverigellu piginneqataassusertik SAS-mi tuninikuuaat, tamanna naatsorsuinermut peqataatinneqarsinnaavoq.

Inuussutissarsiornermi ineriartortitsinissamut aningaasaliisoqassasoq Jacob Pedersenip maluginiarpaa.

- Ineriartortitsinissamut aningaasaliineq pitsaasuuvoq. Angallannerup tungaatigut allannguisoqassatillugu ineriartortitseqqittoqarnissaa pisariaqartarpoq, tassami Europamit takornariat tikiffissaat kisimi isumalluutigineqarsinnaanngilaq. Takornariat ineqarfissaat, nerisaqarnissaat, misigisaqarnissaat allatigullu periarfissaqarnissaat mittarfiliornissani ineriartortissallugit pingaaruteqarpoq. Taamaattumik taamatut aningaasaliisoqarnissaa pitsaasuuvoq, oqarpoq.

Ineriartortitsinermut aningaasalerneqartussat:

Namminersorlutik Oqartussat naalagaaffillu Greenland Venturemut Vækstfondenilmullu 200 mio. kr.-nik Kalaallit Nunaanni aningaasaliinernut ataatsimoorussanut atugassanik aningaasaatissatut tapiissuteqarput. Namminersorlutik Oqartussat naalagaaffillu aningaasaliissutissanit tamarmiusunit 20 mio. kr.-nik aamma 180 mio. kr.-nik aningaasaliissuteqarput, tassanilu siunertarinerpoq Greenland Venture Vækstfondenilu immikkut 100 mio. kr.-nik tunineqarnissaat. Greenland Venture Namminersorlutik Oqartussanit 100 pct.-imik pigineqaannassaaq.

Taassuma saniatigut Greenland ilaatigut Venture Vækstfondenilu tunngaviliussaq qaangernagu Kalaallit Nunaanni inuussutissarsiornikkut suliniutinut pineqartunut nutaarsaasinnaaniasammata Namminersorlutik Oqartussat naalagaaffillu 20 mio. kr.-nik inuussutissarsiornermut puljemik pilersitsipput. Namminersorlutik Oqartussat puljemut 2 mio. kr.-nik naalagaaffillu 18 mio. kr.-nik aningaasalersuissapput, tassanilu siunertarinerpoq Greenland Venture Vækstfondenilu immikkut 10 mio. kr.-nik tunineqarnissaat.

Powered by Labrador CMS