Air Greenlandi qulimiguulinnik annaassiniarnerit ingerlatiinnassavai

Sakkutuut Atortunut Pisiniartarnermullu Aqutsisoqarfiata (FMI) Air Greenlandillu Kalaallit Nunaanni Search and Rescue-mut (SAR) qulimiguulimmik upalungaarsimatitsineq atuuttoq 31. september 2018-imut sivitsorpaat.

Air Greenland tusagassiuutinut nalunaarummi allappoq.

- Issittumi Sakkutooqarfiup Air Greenland Kalaallit Nunaanni qulimiguulimmik upalungaarsimatitsineq pillugu pitsaasumik iluarisimaarnartumillu suleqatigaa. Tamanna ilaatigut Nuugaatsiami qarsutsisoqarneranut atatillugu annaassiniarnermi erserpoq,
Issittumi Sakkutooqarfimmut pisortaq generalmajor Kim Jesper Jørgensen oqarpoq.

Taamaalilluni isumaqatigiissutip imaa, 1. januar 2016-imiit 31. december 2017 ilanngullugu atuuttoq allamik allannguuteqartinneqarani ukiumik ataatsimik sivitsorneqarpoq.

Inuinnarnut SAR-imut upalungaarsimanermut qulimiguulik S61, Kangerlussuarmit aallaaveqartoq piareersimatinneqarpoq, taannalu ukiup ulluini 365-iusuni tamani ullup unnuallu ingerlanerani nal. ak. 24-ni, sap. ak. ulluni arfineq marlunni piareersimasuuvoq. Qulimiguulimmik Bell 212-imik, Qaqortumit aallaaveqartumit taperserneqartarpoq, taannalu ukioq kaajallallugu ullup unnuallu ingerlanerani nal. ak. 8-ni, ataasinngornermiit arfininngorneq tikillugu piareersimasuuvoq.

Qulimiguullit marluusut amooruteqarput, taamaalillutillu immap qaaniit, umiarsuaniit/umiatsianiit, qunnernit itisuuniit qaqqallu
qaannit tikikkuminaatsuniit inunnik tigusisinnaapput. Inuttat, nalinginnaasumik tassaasut pilotit marluk, mekanikeri ataaseq amooruserisorlu ataaseq sianerfigitinnerminniit sivisunerpaamik nal. ak. ataatsip iluani sulilersinnaasussaapput.