Timmisartuussinerit
Air Greenland: Tallimanngornermi angalanissat silamit akornuserneqarput
Sineriak tamakkerlu silarlunnissaa aarlarisaarutaammat pilersaarutaasutut Air Greenland angallassiniarunnaarpoq. Nunatsinni timmisartuussinissat arlallit aamma Airbusip Danmarkimut uterinissaa arfininngornermut kinguartinneqarput
Perluk silarlullu sineriak tamakkerlugu ulluni makkunani atuuttoq Air Greenlandip tallimanngornermi timmisartuussinissaanut sunniuteqarpoq. Nunatsinni timmisartuussinissat arlallit aamma Airbusip Danmarkimut uterinissaa arfininngornermut kinguartinneqarput.
Taama Air Greenland Facebookimi quppernermini nalunaaruteqarpoq.
Atuaruk: Ilulissat: Perlunnera pissutaalluni mittarfimmut aqqut matuneqarpoq
Atuaruk: Ilulissani silarlunnera peqqutaalluni atuarfiit matuneqartut
Uku arfininngornermut kinguartinneqarput
Paamiunut, Sisimiunut, Maniitsumut, Aasiannut, Ilulissanut, Qaarsunut/Uummannamut Nuummullu timmisartuussinissat arfininngornermut Air Greenlandimit kinguartinneqarput.
Airbusip aqagu tallimanngornermi Kangerlussuarmut pinissaa Air Greenlandimit naatsorsuutigineqarpoq, aatsaalli arfininngornermi Danmarkimut utissalluni.
Nuummiit Kujataanut Kujataanilu angalanissat tallimanngornermi ualikkut kingusissukkut nalunaaquttap akunnerinik marlunnik pingasunilluunniit kinguaattoorlutik ingerlanneqarnissaat aamma Air Greenlandimit naatsorsuutigineqarpoq.
Air Greenlandimit aamma ilisimatitsissutigineqarpoq ilaasussat pineqartut tamarmik nutaamik inniminniissunneqassasut angalanissamullu pilersaarummik nutaamik ilisimatinneqarumaarlutik.