Air Greenland: Niels Tækker isornartorsiuinermini ilumoorpa?
Qaammatini kingullerni Nanortalimmut Nanortalimmiillu timmisartuussisarnerit Air Greenlandip misissorpai
– Aallartarnerit 71 procentiisa taamaatinneqaannartarnerannik imaluunniit ullup ingerlanerani aqaguaniluunniit angumeriniartariaqarnerannik Niels Tækkerip oqarnera ilisariuminaatsipparput. Niels Tækkerili ilumoorpoq juunimi qaammatinit siuliinit ajornerusimasoq.
Taamatut Air Greenlandimi PR aamma Marketingschef Kunuk Egede allappoq, Kujataani timmisartuussineq pillugu Niels Tækker Jepsenip isornartorsiuineranut oqaaseqaatitut.
Niels Tækker Jepsenip isornartorsiorpaa Kujataani timmisartuussinernik taamaatitsiinnartarnikkut takornariaqarneq aserorneqartoq. Ilanngullugu isornartorsiorpaa helikopterit S-61-it atorunnaarsinneqarnerat mikinerusunillu Bell 212-inik taaserneqarnerat aalajangiinerusimasoq Nanortalimmiunut angalanermik ajornaannerulersitsinngitsoq.
Timmisartuussinermi kinguaattoornerit assigiinngitsunik sivisussusillit atorneqartarput, Air Greenland Niels Tækker Jepsenimut akissummini nassuiaavoq:
– 1-5 minutsinik kinguaattoornerit piffissaq eqqorlugu (on time) timmisartuussinertut isigineqartarput, 6-15 minutsinik kinguaattoornerit kinguaattoornerit 1-itut (Delay range 1) isigineqartarlutik, 16-30 minutsinik kinguaattoornerit 2-tut, aamma minutsit 31-iniit akunnerit 12-inut kinguaattoornerit 3-tut isigineqartarlutik.
Aamma atuaruk: Takornariaqarnermut pisortaq: Bell ajorpallaaqaat
– Marsimiit juunimut, qaammatit taakkua marluk ilanngullugit, Nanortalimmiit Nanortalimmullu timmisartuussinerit 450-it pilersaarutigisimavagut. Tamakkua 74 procentii ingerlanneqarput 26 procentiilu ingerlanneqaratik. Ingerlanneqanngitsunut 26 procentinut ilaapput nunaqarfinnut timmisartuussinerit taamaatiinnarneqartut, pissutigalugu ilaasussaqanngimmat nassiussaqarnaniluunniit. Kisitsimmut tassunga aamma ilaapput timmisartuussinerit ima ilaasukitsigisut, ulloq taanna timmisartuussinerit marluk katinneqarsinnaallutik, ilaasunut aqqusaagassanut akornutaanngippata. Kiisalu tamatumunnga ilaapput timmisartuussinerit silarlunnera imaluunniit timmisartup teknikkikkut ajornartorsiuteqarnera pissutigalugu taamaatiinnarneqartut, Air Greenland nassuiaavoq.
Timmisartuussinernut ingerlanneqarsimasunut kisitsisit imaapput
On time 6-15 min. 16-30 min. 31 min. 12 tim.
Marsi 70,13 20,78 3,90 5,19
Apriili 75,28 13,48 3,37 7,87
Maaji 75,00 6,82 5,68 12,50
Juuni 65,82 j 6,33 6,33 21,52
Katillugit 71,77 11,71 4,80 11,71
– Tassa timmisartuussinerit 71,77 procentii piffissaq eqqorlugu ingerlanneqartarput (tassa aallarnissamik pilersaarummi minutsit 5 iluanni), 88,28 procentillu aallarnissamik pilersaarummi akunnerup affaata iluani ingerlanneqartarlutik. Timmisartuussinerit taamaatiinnarneqartut 26 procentiummata (taaneqareersutut assigiinngitsorpassuit pissutigalugit taamaatiinnarneqartartut) takusinnaanngilarput timmisartuussinerit 71 procentii taamaatiinnarneqartartut imaluunniit ulloq taanna aqaguaniluunniit angumeriniarneqartartut, Air Greenland allappoq.