Angallanneq
Air Greenland mittarfiit nutaat pillugit: Nunap iluani timmisartorneq akikillerulernavianngilaq
Air Greenlandip pisortaanera naapertorlugu mittarfiit tallineqarnerat ilaasunut, nunap iluani timmisartortunut, billetsit akikinnerulernavianngillat
Ilulissani Nuummilu mittarfiit tallineqarnerat taamaallaat Kalaallit Nunaannut Kalaallillu Nunaanniit angalanermut iluaqutaassaaq, Air Greenlandip pisortaanera Michael Højgaard Nuummi innutaasut ataatsimiinneranni Qassimiuaarnermi, sulinermik inuussutissarsiuteqartut kattuffiata SIK-p aaqqissuussaani, oqarpoq.
Pingasunngormat ullap tungaani oqaluuserineqartoq qulequtaqarpoq: ´Kalaallit Nunaannut isaaffik aniaffillu´, tamatumani attaveqarneq, mittarfiit nutaat periarfissallu nutaat oqaluuserineqarlutik.
Akikinnerusumik ingerlatsineq
Air Greenland ukiumut 1,2 milliarder koruuninik kaaviiaartitsisarpoq 550-inillu sulisoqarluni.
Taamaattumik Naalakkersuisut sulissutigisaattut Nuummi Ilulissanilu mittarfiit tallineqarnerisigut aningaasartuutit annikinnerulersinnissaat Michael Højgaardip soqutigisaasa ilagaat.
Taanna isumaqarpoqnunap attaveqarnikkut aaqqissuusseqqinnissaq atorfissaqartikkaa, nutaanillu aningaasaliissuteqartoqassasoq.
Taassuma isertuutinngilaa inuinnaat nunap iluani timmisartorniartut naatsorsuutigissanngikkaat mittarfiit allineqarpata nunap iluani timmisartorneq akikinnerulissasoq.
80 procentit Københavnimut
– Nunamut nunamiillu timmisartornerit kisimik akikinnerulissapput, nunap iluani timmisartumut billetsit akii malunnartumik apparnavianngillat, taanna tikkuaavoq.
Ullumikkut ilaasut tamarmiusut affai Nuummut timmisartortarput. Ilaasut 80 procentii Københavnimut angalasuusarput, 25 procentiilu Ilulissiartuusarlutik.