nalunaarusiaq siulleq

Air Greenland: Ingerlatsinermut atortut misissorneqassapput

Timmisartup assakaasuata niuluata napinera pissutaalluni Ilulissani januaarip 29-ani ajutoorpoq. Dash 8 sakkortuallaamik minnerani niulua napisussatut sanaavoq

Air Greenlandip timmisartuisa ilaat Dash 8 Ilulissat mittarfianut minnermini ajutoorpoq januaarip 29-ani, qujanartumik timmisartuni ilaasuni annertunerusumik ajoqqusertoqanngilaq

Air Greenlandimi kukkusoqarnera pissutaalluni timmisartoq Dash 8-p Ilulissani ajutoortoq, Air Greenlandip pisortaa Michael Højgaardip nassuerutigaa.

Nalunaarusiaagallartumi ilaatigut takuneqarsinnaavoq timmisartup assakaasua napisimasoq, timmisartullu sananeqaataa pissutaalluni assakaasua napilluni. Timmisartoq sakkortuallaamik mikkuni assakaasoq napisussatut sanaavoq, napinngikkuni ajornermik pisoqarsinnaanera pissutigalugu.

Assakaasuata saamerliup niulua napisimanngitsuuguni imaassinnaasoq timmisartoq ikuallalersimassagaluartoq.

Misissuinerit
- Naluungilarput sooq assakaasup niulua napisimanersoq. Tassanngaanniit paasissutissat allat misissussavagut. Timmisartup milernerani anoraa pissutaavoq ajutoornermut, atortutigut ajutoornerunani. Taamaattumik ingerlatsinermut maleruaqqusat misissortariaqarpagut, Air Greenlandimi pisortaq Michael Højgaard oqarpoq.

- Silap qanoq ajortigineranut qaqagukkut timmisartuussisassanerluta misissussavarput, timmisartuliorfiit killigititaat misissoqqinneratigut, pisortaq oqarpoq.

Timmisartut Dash 8-tat killigisitaqarput 36 knobimik sanimut anorlertumi 10 knobimillu oqumigaartumik anorlertumi minnissamut maleruaqqusaqarput.

Anori sakkortooq
Ilulissani mittarfik takivallaanngilaq, ullormilu ajutoorfiusumi sanimut 26 knobimik anorlerpoq, killigititarisaq 36 knobiulluni.

- Anorlerpallaartumi timmisartoq minngila?

- Maleruaqqusat maannakkut misissuleruttorpagut sooq uunga maannakkut pisimanerluta. Inatsisit atuuttut iluini sulivugut, sukumiisumilli misissugassat maannakkut misissorneqaleruttorput, Michael Højgaard oqarpoq.

- Timmisartup aquttua kukkuluttunngila?

- Tamanna oqaatigissallugu siusippallaarpoq. Ajutoortoqarnerani apeqqut annersaasoq tassaavoq sooq ilumut timmisartoq ajutoornersoq. Timmisartumi aquttoq kukkusimasinnaavoq imaluunniit timmisartumi ingerlatsinermut atorneqartartut ajoqquteqarsimasinnaapput, kisiannili tassa suli oqaaseqarfiginissaa maannakkut suli nalunarpoq.

Angalanissaq isumannarpoq
- Timmisartumut Dash 8-mut ilaanissaq qanoq isumannaatsigaa?

- Timmisartumut ilaanissaq isumannarpoq.

- Ajutoortoqammerpormi.

- Pissutsit assigiinngitsut peqqutaallutik ajutoortoqarpoq, maannakkulli maleruaqqusagut sukaterpagut ajutoortoqaqqinnginnissaa anguniarlugu, pisortaq oqarpoq.

Nunarsuarmi sumiiffinni assigiinngitsuni timmisartup assakaasuata niuluinik napisoqarnissaanissaanik sanaat napinerini suli inunnik annaasaqartoqarnikuunngilaq.

Powered by Labrador CMS