silaannakkut angallanneq
Air Greenland: Inatsisartut isornartorsiuinerat uniorpoq
Air Greenland isornartorsiorneqarnerminut akivoq
Air Greenland taama nalunaarpoq marlunngornermi Inatsisartuni oqallinnermi Air Greenlandip illoqarfinnik akunnattumik angissusilinnik isorliunerusunillu sullissinera isornartorsiorneqareersoq. Isornartorsiorneqartut ilagaat kujataani timmisartuussineq.
- Ukiorpassuanngortuni aatsaat taama eqaatsigisumik kujataani timmisartuussisoqarpoq. Timmisartuussinerit siornatigumut sanilliullugit amerlanipilussuupput aammalu sapaatip akunneranut marloriarluni ulloq ataaseq atorlugu Danmarkimut angalasoqarsinnaalernikuulluni, Air Greenlandimi aningaasarsiornermut pisortaq Christian Keldsen Sermitsiaq.AG-mut oqarpoq.
Inatsisartut sanaartornermut ataatsimiititaliaata aamma piumasaraa unammilleqatigiinneq nunatsinnut eqqunneqartariaqartoq Air Greenland eqaannerusumik sullissinianngippat.
- Unammilleqatigiinnissamut Kalaallit Nunaanni periarfissaqareerpoq. Inatsisitigut unammillerneqarsinnaanermut illersugaanngilagut. Ullumikkut unamillertoqannginneranut pissutaavoq taamatut ingerlanissamut ilaasussat amigarmata, Christian Keldsen oqarpoq.