Air Greenland Disko Linelu timmisartuussinissat isumaqatiginninniutigaat

Umiarsuaateqarfik aamma Air Greenland angallannermut kiffartuussinissamut isumaqatigiissutinut tunngatillugu arlalinnik isumaqatiginninniutinik inissiinissanik suli amigaateqarput.

Atuaruk: Isumaqatigiissutit nutaat paatsiveqartinneqanngillat

Qulimiguulimmik attartussasoq
Namminersorlutik Oqartussat aamma angallassisussat akornanni isumaqatigiissutit ukioq nutaamit atuutilissapput, isumaqatigiissummilu tunngaviusumi umiarsuaateqarfiup isumaqatigiissutit amerlanerpaartaat tigussavaat - ilaatigut Kujataani angallassinerup iluarsineqarnissaanut akisussaaffik ilanngullugu.

Tassungalu tunngatillugu umiarsuaateqarfiup Air Greenland sumiiffimmi illoqarfiit akornanni angallassisutut attartorniarpaa.

Qulimiguulimmik timmisartuussisarnissap qanoq isikkoqarnera, Disko Linep qanittukkut saqqummiuteqqammerpaa.

Qulimiguullit marluk
Tassani takuneqarsinnaavoq, umiarsuaateqarfiup qulimiguullit marluk Bell-212-it marluk qulingiluanik ilaasoqarsinnaasut attartorsimagai, taamatullu qulimiguulik AS350 tallimanik ilaasoqarsinnaasoq ulapippallaartoqartillugu ilanngunneqartassaaq.

Ilanngullugu Disko Linep kalerriutigaa, ilaasut amerlisinniarlugit saniatigut qulimiguulinnik sullissisunik ilanngussisoqartarsinnaassasoq.

Kisianni amerlineqarnissaanut apeqqut illuanik suli inissinngilaq, umiarsuaateqarfiup pisortaata Frederik Sandgreenip tamanna nassuerutigaa, taassumali aaqqiissuteqartoqarnissaa qularinngilaa.

Disko Linep aamma Air Greenlandip akornanni ataatsimiinnissat pilersaarutaapput, taanna ilisimatitsivoq.

Atuaruk: Akerliusut: Knud Kristiansen, tunuarit

Ungasissumut pilersaarusiorneq
Air Greenlandip pisortaanera, Michael Højgaard, aaqqiissutissat pitsaanerpaat nassaariniarlugit timmisartortsivik aamma sulissuteqartoq ilanngullugu oqarpoq. Tassunga tunngatillugu ilaatigut Air Greenlandip piffissamut ungasissumut pilersaarusiornerata ataqatigiilernissaa pineqarpoq.

Atuaruk: Kommune Kujalliup kiffartuussinissamut isumaqatigiissut dumpertippaa

Timmisartortitseqatigiiffik maanna kiffartuussinermut isumaqatigiissutaasut atorlugit qulimiguulimmik ukiumut 2.000 tiimit atorlugit timmisoqartartoq, pisortaanerup oqaatigaa. Ukioq nutaamiillu aaqqiissutit nutaat malillugit timmisartuussinerit ikinnerujussuanngussapput - isumaqatigiissutit taamaaginnassappata - timmisartuussisarneq ukiumut 500 tiimiinnanngussaaq.

Assit takukkit: Qaqortumi akerliussutsimik takutitsisut aatsaat taama amerlatigisut

Suleqatigiit ataatsit
Disko Linep aamma maannamut qulimiguulik Bell 212 ataaseq, suleqatigiinnik ataatsiinik - marluunngitsunik - ingerlarneqartassasoq aaqqiissutigaa.

- Timmisartuussinitta amerlassusaasa pingajorarterutaannut sisamararterutaannullu annikillisaagutta suliffeqarfitsinnut kinguneqartussaavoq. Maanna kalerriutigereerparput, Air Greenlandip sulisut 45-t peerniarai, taakkunannga timmisartortartut quliussapput. Taassuma saniatigut Bell 212-it qulimiguullit arfineq-pingasuusunit marluk suliassaninngikkutta tuniniassavagut. Qulimiguulinnik sulisunillu suliassaqarnerinik ilisimanngisatsinnik peqarnissamut akissaqanngilluinnarpugut, Michael Højgaard oqarpoq.