isumaqatigiissutit
Air Greenland atorfinitsitseqqiinissaminut piareersimavoq
Aningaasaqarnermut Akileraartarnermullu Ataatsimiititaliap assartuussisarneq pillugu kiffartuunneqarnissamut isumaqatigiissutip ukiumik ataatsimik sivittorneqarnissaa kaammattuutigereeraalu, Air Greenland sulisunik 30-nik soraarsitaraluaminik atorunnaarsitsinissaminut maanna piareersimalerpoq
Air Greenlandip sulisumi 648-t akornanni 30-t nunatta kujataani angallannerup 2015-imiit allanngornissaa naatsorsuutigineqalermat aggustip 29-ani soraarsippai.
Kisianni Aningaasaqarnermut Akileraartarnermullu Ataatsimiititaliap Naalakkersuisuungallartunut assartuussisarneq pillugu kiffartuunneqarnissamut isumaqatigiissutip ukiumik ataatsimik sivittorneqarnissaa oktobarip qaammataani kaammattuutigaa.
Tamannalu isumaqarpoq Air Greenlandimut maanna piareersimalersitsivoq sulisuminut 30-nut kujataani soraarsitaminut atorfinitsitseqqinnissaminut.
Atuaruk: Air Greenland sulisunik 30-nik soraarsitsivoq
- Kalerrinneqarutta assartuussisarneq pillugu kiffartuunneqarnissamut isumaqatigiissut uagut ingerlateqqissagipput ukiumit nutaamit, taava sulisut soraarsinneqartut erngerluta atorfinitseqqissavagut, Air Greenlandip pisortaanera, Michael Højgaard, Sermitsiaq.AG-mut oqarpoq.
- Ullumikkullu taamaaliorusunneruvugut, aqagu utaqqinagu.
Air Greenlandermiummi Naalakkersuisuungallartunit suli kalerrinneqarsimanngillat assartuussisarneq pillugu kiffartuunneqarnissamut isumaqatigiissut ukiumik ataatsimik sivittorneqarallassanersoq.
- Aamma kalerrinneqarutta erngerluta angalanissamut pilersaarutit ikkutissavagut. Maannami assartuussisarneq pillugu kiffartuunneqarnissamut isumaqatigiissuteqarfiusuni angalanissamut pilersaarutit ukiup naanissaanut kisimik pilersaaruteqarfiugallarmata.
Tamatuma saniatigut Michael Højgaardip Sermitsiaq.AG-mut oqaluttuaraa Air Greenlandip aamma Mittarfeqarfiit iluminni isumaqatigiissutigisimagaat hangarinut inissianut attartornissamut isumaqatigiissutit erngerlutik atuutileqqinneqassasut, assartuussisarneq pillugu kiffartuunneqarnissamut isumaqatigiissut pisortatigoortumik nalunaarutigineqarsimaleriarpat.