Sportsligt
Air Greenland aningaasaliisunngoqqippoq
Air Greenland aamma GIF suleqatigiinnissamik isumaqatigiissuteqaqqipput 2014 ilanngullugu atuuttussamik. Isumaqatigiissut tallimanngormat atsiorneqarpoq
Air Greenlandip GIF-illu ukiorpassuarni suleqatigiissimanerat 2013-imi januaarimiilli uninngasimagaluarpoq. Tamanna suleqatigiinnermut tunngavimmik nutaamik eqqarsarnissamut periarfissiisimavoq, maannalu nutaamik isumaqatigiissuteqartoqarpoq ersarilluinnartunik sammisaqarfittalinnik.
Aningaasaliissutit 1,5 millioner koruuniupput. Aningaasaliissutit 2014 ilanngullugu atuutissapput.
Isumaqatigiissutikkut siunertarineqarpoq Nunatsinni timersornerup tapersersorneqarnissaa ineriartorteqqinneqarnissaallu tamannalu pissaaq Nunatsinni timersortartut, sungiusaasut, holdlederit dommerillu, unammiuaariarlutik pikkorissariarlutillu angalasut Air Greenlandip aningaasaliiffigisarnerisigut.
Tamatumani sammisaqarfiit sisamat pingaarnerusumik sammineqassapput. Tassalu ilinniagaqartitineq ineriartortitsinerlu, meeqqanik inuusuttunillu samminninneq, pinnguarnermut ilikkagaqarnissamullu inissalimmik, soorluttaaq isorliunerusuni tamanik timersortartut samminiarneqartut. Tamakkua pingaarnerusumik qitiusutut samminiarneqarput Air Greenlandip GIF-illu piffissamut sivisunerusumut suleqartigiinnissamik isumaqatigiissuteqarnerannut.
Air Greenlandip GIF-illu suleqatigiinnissaq qilanaaraat.
– Suliniutitigut nutaatigut timersornermi piumassutsiminnik sulisartuvut piginnaasaqarnerulersissavagut nunamilu pissartanngorniuttoqassatillugu pilersaarusiorneq ajornannginnerulersillugu. Suliniut tamanna isumaqatigiissutikkut isumagineqarpoq, taamaattumik Air Greenlandimik suleqatigiinnissamik isumaqatigiissuteqaqqinnerput nuannaarutigaarput, GIF-imi siulersuisunut ilaasortaq Ole Kielmann Hansen oqarpoq.
Taamaasilluni Air Greenland Kalaallit Nunaanni Timersoqatigiit Kattuffianni pingaarnerusutut aningaasaliisunngorpoq, ilagalugu Elite Sport Greenland, taamaasillunilu Nunatsinni timersortartut kakkannerit timersuutillu assigiinngitsut aningaasalersorlugit.