Air Greenland: Angallassinissat allannguuteqassanngillat

Islandimi innermik anitsiffiusoq Bardarbunga sisamanngornermi innermik anitsilerpoq.

Islandimi silaannakkut angallaffiup ilaa matuneqarpoq tallimanngornermi innermik anitsisoqareersoq.

- Air Greenlandimi niuernermut pisortaq, Christian Keldsen, Islandimi innermik anitsisoqarnera Air Greenlandimut ilaasussanullu qanoq sunniuteqarpa?

- Ullumi ajornartorsiutitaqanngitsumik angallassisoqassaaq. Kangerlussuarmit Københavniliartaat Islandi avaqquttussaavaa, taamaattumik innermik anitsisoqarnera suli sunniinngikkallassaaq.

- Kingullermik 2011-mi 2010-milu innermik anitsisoqarmat timmisartornerit unitsinneqarput, tamanna aamma maannakkut ilimagineqassava?

- Ullumi unititsiinnartoqassanngilaq, pisorli malinnaaffigaarput. Innermik anitsiviup eqqaaniittoq sermersuaq sunnerneqassappat aatsaat iliuuseqartariaqalissaagut. Tamannami 2010-mi 2011-milu ajornartorsiutigineqarpoq, Christian Keldsen oqarpoq.

Innermik anitsisoq Bardarbunga sermersuup Dyngjujökullimut 40 kilometerinik ungasitsigaaq. Taamaattumik innermik anitsisoqarnerani arsakorpassuit pilersinneqarsinnaapput. Taamatulli suli pisoqanngilaq.

Timmisartoqarfik Akureyri Reykjavikimit 380 kilometerimit ungasitsigaaq, avannarpasinnerulluni. Timmisartoqarfim matoqqatinneqarpoq 18.000 fods tikillugu qummut matoqqatinneqarluni. 5,5 kilometerit missaanniippoq.

Innermik anitsineq annertussappat 2010-mitut silaannakkut angallannerit unitsinneqaratarsinnaapput. Tassani Eyjafjallajökull innermik anitsivoq.