Air Greenland
Air Greelandip timmisartuutaa motortikkut ajutoorluni utertariaqarsimavoq
Timmisartoq Dash-8 ataasinngornerup unnukkuani Nuummukartilluni timmitsartup motooriata aappaani ajutoorneq pissutigalugu Kangerlussuarmut utertariaqarsimavoq.
Air Greenlandip timmisartuutaa Dash-8 ataasinngornerup unnukkuani Nuummut ingerlaarnermini 37-nik ilaasoqarluni minutsit 30-t ingerlareertut Kangerlussuarmut utertariaqarsimavoq.
Timmisartup motoriata aappaanik ajutoornermit taama pisoqarpoq. Timmisartoq nalunaaqutaq 21.11 Kangerlussuarmiit qangattarpoq nalunaaqutarllu 21.34 uterluni.
- Timmisartup naalagaa ajornartoornermi suleriaasissatut peqqussutit malillugit pisumik isumaginnippoq Kangerlussuarmullu uterniarluni aalajangerluni, minnerlu annertunerusumik ajornartoorfiunani naammassineqarpoq Air Greenland tusagassiuutinut nalunaarummi allappoq.
Ilaasut nassuiaaqqissaarneqartut
Timmisartoq Kangerlussuarmut tikeqqimmat ilaasut 37-t tamarmik katersorneqarput, tassanilu inuttanit allaffimmilu sulisunit nassuiaaqqissaarfigineqarlutik.
- Timmisartoq pisunut taamaattunut naleqqussagaavoq, aammalu pilotivut piviusuusaartitsivimmi motoorimik ajoqusertoqarnissaanut sungiusartuaannarput. Inuttat pisoq piginnaaneqarluarlutik, aammalu suleriaatsivut atuuttut tamaasa
malillugit isumagaat, timmisartuuussisarnernut pisortaagallartoq Michael Madsen tusagassiuutinut nalunaarummi oqarpoq.
Oqartussaasut pisoq pillugu kalerrinneqarput, aammalu Air Greenlandip suleriaatsini peqqussutit malillugit nammineerluni motoorip ajoqutaa misissorlugu aallartippaa.