Ahmed Akkari Narsamut uteqqippoq

Jyllands-Posten ullumi oqaluttuarpoq imam-iusimasoq Akkari Kalaallit Nunaannut nuuttariaqarsimasoq, taannali aggustip aallaqqaataani Sermitsiamut oqarpoq Kalaallit Nunaannut nuulluni eqqissisimarusukkami allanniaramilu

Imam-iusimavoq Ahmed Akkari Narsamut uteqqippoq, tassani Nunatsinni ilinniagaqartitsinermi pissutsit pillugit oqaaseqaatinik allagaqarluni

Muhammed-imik oqallinnermi inuit malunnaateqarnerpaasimasut ilaat suliffissaqannginnami Danmarkimit aallartariaqarsimavoq. Imam-iusimasoq Ahmed Akkari aggustimi Kujataani Narsamut nuuppoq, tassani atuarfimmi ilinniartitsisutut atorfinilluni.

Taamatut paasissutissiivoq Jyllands-Posten.

Ahmed Akkari siorna aasakkut aalassatsitsivoq sassarami oqaluttuarlunilu isummani allanngortissimallugu maannalu islam-isiorneq akerlerilersimallugu, siusinnerusukkut illersorsimasani.

Upernaaq atuakkiaa "Mit farvel til islamismen" saqqummerpoq, tassanilu ilaatigut oqaluttuaraa Muhammed-imik ajornartorsiuteqarnerup nalaani qanoq pisoqarsimanersoq. Taamanikkut akerlilersuisoqatigiinni siuttut ilaattut oqaaseqartartuuvoq.

Aggustip aallaqqaataani Ahmed Akkari Sermirtsiamut oqarpoq Kalaallit Nunaannut nuussimalluni eqqissisimaniarluni.

– Tamanna ersarissumik tulleriiaarineruvoq, tassami Danmarkimiiginnarnissannut sunik tamanik pissutissaqaraluarama aggersarneqartuartarama. Atuakkalli saqqummersinneqarnerata kingorna ullut ulapiffiusut tamaviaarnartut kingorna eqqissisimarusussimavunga, taanna Sermitsiamut oqarpoq.

Taamanikkut Sermitsiap atuartartui oqaluttuuppai eqqissisimaneq atorniarlugu sivisuumik isumaliutigisimasami allannissaannut, itisuumillu eqqarsarnissamut Narsamik pitsaanerusoqanngilaq, taanna oqarpoq.

– Isumassarsiatut allataassaaq, inuuneq inuttullu toqqartakkavut pillugit, taanna nassuiaavoq itisilerillunilu:

– Aammattaarli oqallinnermi peqataasassaanga, assersuutigalugu aviisini ilanngussatigut, immaqa ilinniagaqarnermut tunngasunik aammalu atortorissaatit nutaaliat soorlu iPad-it atuartitsinermi atorneqarsinnaanerannik, Ahmed Akkari aggustip aallaqqaataani Sermitsiamut oqarpoq.

Ullumikkullu Sermitsiami saqqummersumi ilinniagaqarnermik sammittumi, Akkari ilinniagaqarneq pillugu oqallinnermi angajoqqaat akisussaassuseqarnerat pillugu takinerusumik ilanngussaqarpoq.

Powered by Labrador CMS