Nuuk
Aggustimi parnaarussivissamut qaartitseqqaartoqassaaq
Kalaallit Nunaanni Pinerluuteqarsimasunik Isumaginniffik tallimanngornermi nalunaarpoq qaqugu parnaarussivissamut qaartitseqqartoqassanersoq, taannalu nalliussineqassaaq
Aggustip qiteqqunnerani Kalaallit Nunaanni parnaarussiviup siulliup sananeqarneranut atatillugu qaqqami qaartitsineq siulleq pissaaq. Tamatumunnga atatillugu Pinerluuteqarsimasunik Isumaginniffik atoqqaarfissiortitsinermut qaaqqusivoq.
Ataasinngornermi aggustip 17-ianni qaartitsineq siulleq pissaaq. Tamanna pissaaq nal. 13-15 Niaqornannguani sanaartorfissami. Qaartitsinerup kingorna oqalugiassapput Danmarkimi Direktoratet for Kriminalforsorgenimi centerimi pisortaq Annette Esdorf, Kalaallit Nunaanni Pinerluuteqarsimasunik Isumaginniffimmi pisortaq Hans Jørgen Engbo, pinngortitanut, avatangiisinut inatsiseqarnermullu Naalakkersuisoq Mala Høy Kúko kiisalu borgmester Asii Chemnitz Narup.
Suliniutip tunuliaqutaa
Kalaallit Danmarkimi parnaarussivimmut Herstedvesterimut piffissaa aalajangernagu pineqaatissinneqartarnerat naammaginartuunersoq naammaginartuunnginnersorluunniit ukiuni qulikkaani oqaluuserineqareersoq, 2009-mi Folketingi aalajangerpoq Kalaallit Nunaanni nutaamik isertitsiviliortoqassasoq, ilaatrigut parnaarussanut matoqqasumik immikkoortortalimmik, taamaasilluni pineqaatissinneqartunik Danmarkimut aallartitsisarneq pisariaqarunnaassalluni.
Suliniut siunnersuisutut ingeniøritut ingerlatsiviup Rambøll Danmarkip, Friis & Moltke, Schmidt Hammer Lassen Architects, Rambøll Grønland aamma Møller & Grønborg suleqatigalugit ingerlatissavaa.
Sanaartornermik ingerlatsiviup Permagreenip parnaarussivik (matoqqasoq, aaqqiss.) sanassavaa, peqatigalugit HJ-Tek aamma Arssarnerit. Sikom Danmarkip isertitsiviup isumannaatsuunera isumagissavaa.
Inatsisinik atortitsinermut ministereqarfiup ataani Direktoratet for Kriminalforsorgen sanaartortitsisuuvoq, Bascon siunnersortigalugu.