Agathe Fontain: Ingerlalluartut annikitsuinnarmik pilliuteqartariaqartut

- Meeqqat nunatta siunissai eqqarsaatigalugit imigassaq pillugu inatsisip allanngortinneqarnissaa kissaatigaara. Imigassamik atuineq annertusiartortillugu maanna iliuuseqartariaqarpugut.

Inatsisartuni ilaasortap Mala Høy Kúkop (A) aammalu Atassutip Inuusuttaanni siulittaasup Aqqalu Jerimiassenip, Naalakkersuisup imigassamut inatsisissaq pillugu isornartorsiuinerisa kingorna, Peqqissutsimut Naalakkersuisoq Agathe Fontain taama oqarpoq.

Oqallinnermi oqaatsit torersut atorneqartarlik

Atassutip oqallinnermi oqariaatsit atugai Agathe Fontainip akuersaarsinnaanngilai, isumaqarporli oqaatsit torersut atorneqartariaqartut

Agathe Fontain tager afstand fra de vendinger som Atassut bruger i debatten, som hun mener, bør holdes i en ordentlig tone.

- Imigassaq pillugu oqallinnermi Atassutip allatut isumaqarnera akueraara isumaqarlungali taaguummik ”Naqisimanninnermut Naalakkersuisoq” atuinermikkut Atassutip Inuusuttaasa Kalaallit Nunaat Nordkoreamut assersuuttariaqanngikkaat. Oqallinnermi taama pingaaruteqartigisumi taama oqarneq appasippallaartumut inissiineruvoq, Namminersorlutik Oqartussat aallaavigalugit taanna oqarpoq.

Atuaruk: Naalakkersuisut imigassamik inatsisissatut siunnersuutaat Atassummit isorineqartoq

Inatsimmik sukaterisoqarnissaanik kissaateqartoq

Taanna imigassamut inatsip sukateriffigineqarnissaa suli kissaatigaa.

- Atornerluineq pissutaalluni meeqqat inuusuttuaqqallu amerlavallaat pilliutaasarput, nalunngilarpullu atornerluisuuneq kingornunneqartartoq. Inuit inuiaqatigiinnik nukittuunik ineriartortitseqataasussaagaluit atornerluinermit aserorsarneqarput. Taamaattumik sapinngisarput tamaat iliuuseqartariaqarpugut. Iliuuseqarfigisinnaasatta ilaat tassaavoq imigassaq pillugu inatsimmik sukaterineq, Agathe Fontain erseqqissaavoq.

Inatsit atuutilerneqassappat, Atassutip Inuusuttaasa siulittaasuata, Aqqalu Jerimiassenip ernummatigaa ernermi apersortinnerani nalliuttorsiornissartik, inuusuttuaqqammi 18-it inorlugit ukiullit nal. qulit kingorna imigassamik sassaallertarfimmeeqqusaajunnaarlutillu neriniartarfimmeeqqusaajunnaartussaammaata.

Siulittaasorli eqqisissisimasinnaasoq, Agathe Fontain isumaqarpoq.

- Meeqqalli inuusuttuaqqallu 18-it inorlugit ukiullit assersuutigalugu apersortittoqarnerani katittoqarneraniluunniit ilaqutariit cafémi neriniartarfimmiluunniit tamanut ammanngitsumik katerisimaarneranni peqataasinnaassannginnissaat siunnersuummi siunertarineqanngilaq. Inatsisissatut siunnersuummi inaarutaasumi tamanna eqqumaffiginiarneqassaaq, Peqqissutsimut Naalakkersuisoq tikkuaavoq.

Atuaruk: Atassutip Inuusuttai: Naqisimanninniarnermut Naalakkersuisuuvoq

Ingerlalluartut pilliuteqartariaqartut

Inuit ”ilaannaat” imigassamik atuinerminnik aqutsisinnaannginnerat pissutigiinnarlugu, inuiaqatigiit sooq pillarneqarniarnersut Mala Høy Kúkop apeqqutigaa.

- Ilumoorpoq inatsit inuit ilaannut annikitsuinnarmik isumagali malillugu naammaginartumik killiliissaaq. Inuttut kiffaanngissuseqarnissaq Atassut assigalugu assut pingaartippara. Isumaqarpungali inuiaqatigiinni ajornartorsiut ima annertutigisinnaasoq ajornartorsiornerpaat ikiorserniarlugit ingerlalluartut annikitsuinnarmik pilliuteqartariaqartut, Inatsisartuni ilaasortap isornartorsiuineranut, taanna akissuteqarpoq.

Atuaruk: Imigassamut atornerluinermulli inatsisissaq: Aajuku suliniutigineqartut

Inuussutissarsiornermik ingerlataqartut pillarneqarnissaat pillugit isornartorsiuinermut, 'meeqqat atugaasa eqqarsaatiginissaat namminersorlutik inuussutissarsiutillit eqqarsaatiginissaannit pingaaruteqarnerusoq.' Agathe Fontainip akissuteqaatigaa.

- Isumaqarluinnarpungalu namminersorlutik inuussutissarsiutillit inuiaqatigiinnik ingerlalluartunik peqqissunillu pilersitsinissamut tapeeqataanissartik aamma kissaatigissagaat, Agathe Fontain oqarpoq.

Atuaruk: Niuertarfiit imigassamut inatsit naalagaaniarnertut taagaat