Qaqortoq
Adventure Guidet siulliit allagartartaartut
Campus Kujallermi Qaqortumiittumi allagartartaartitsineq ullumi tallimanngornermi ingerlanneqassaaq
Nunatsinni adventure guides aqqanillit siulliit Campus Kujallermi Qaqortumiittumi allagartartaalerput.
Ullumi tallimanngornermi tamanna pissaaq.
Ilinniartut ukiup affaata ingerlanerani quleriarlutik misilitsipput. Misilitsissutaasullu assigiinngiiaartut ilinniarfiut pisortaata Rie Oldenburgip paasissutissiissutigaa.
- Allattoriarsornermi oqaluttariarsornermilu misilitsinnerit 'naliginnaasut' illup iluani ingerlanneqarput. Misiliinerillu arlallit qaqqajunnami ingerlanneqarlutik. Ilinniartut aamma Sermermiuni Ilulissaniittumi ullut pingasut misilitsipput. Tassani pilersaarusiukkamik, nuannersumik isumannaatsumillu tuperiartitsisinnaanertik takutillugu. Inaarutaasumilli misilitsissut Qaqortumi ingerlanneqarpoq, Rie Oldenburg allappoq.
Allagartartaartitsineq Campus Kujallermi nalunaaqutaq qulinut ingerlanneqassaaq.