erinarsoqatigiit
Aavaat Maribop oqaluffissaarsuani tusarnaartitsisut
Kalaallit erinarsoqatigiivi Aavaat Maribo Domkirke Lollandimiittoq siullermeerlutik pulaarpaat
Tallimanngormat Avaat pulaarnerisa kingorna, Maribo Domkirkemi kalaallit tusarnaartitsinikuunngisaannartut oqaatigineqarsinnaajunnaarpoq.
Ornigarneqarluartoq
Naak Blak Fridayimi oqaluffissaarsuullu illoqarfiani Maribomi 5.800 missaani innuttaasulimmi, allanik pissaganartunik aaqqissuussisoqaraluartoq, oqaluffissaarsuaq ornigarneqarluarsimavoq, erinarsoqatigiit tusagassiuutinut nalunaarummi paasissutissiipput.
Aavaat erinarsoqatigiinni aqutsisoq Joâo Peas aqutsisoralugu, oqaluffissaarsuarmi pattattup Vibeke Vanggaard tussiut Nersortigut Qilammiu atornerani, ingerlaaqatigiillutik tusaartitsineq aallarnerpaat. Kalaallillut tussiutaat erinarsuutaallu ilisimaneqarluartut atorneqareernerisa kingorna erinarsoqatigiit juullisiutinik erinarsoqattaarput, tusarnaartitsinermilu tusarnaarianit nuannarineqaqisumik Guuterput naggasiutigineqarpoq.
- Guuterput qallunaanit ataqqineqarluinnarpoq, DR-immi Julehilsen Grønland aallakaatinneqarnerani qallunaat amerlanersaasa juullimi tussiut tusartarlugulu ilikkarsimavaat, Aavaat siulittaasuat Carsten Siegstad oqarpoq.
Qaammatini arfinilinni oqaluffissaarsuit pingasut
Siulittaasup erseqqissaatigaa, Aavaat qaammatit arfinillit ingerlanerini qallunaat oqaluffissaarsuini pingasuni tusarnaartitsisimanertik tulluusimaarutigilluinnarsinnaagaat. Erinarsoqatigiit maajip qaammataani Roskilde Domkirkemiipput juunillu qaammataani Aalborg Domkirkemiillutik.
- Tusarnaartitsinerit pitsaalluinnarput, qallunaat erinarsoqatigiivisaluunniit angusinnaanngisaat. Qallunaammi oqaluffissaarsuini tusarnaartitsisinnaaneq ajornakusoortupilussuuvoq. Oqaluffissaarsuarni pattattut oqaluffissaarsuarni tusarnaartitsinerni akisussaasut arlalinnik saaffigineqartarput, oqaluffissaarsuillu ilaat qaammatini arlalinni siunissarluunniit ungasinnerusoq eqqarsaatigalugu piareersaasiorfioreersinnaasarput, Carsten Siegstad oqarpoq.
Taanna oqaluffissaarsuarni attaveqaatinut saaffiginnissuteqarnermullu akisussaasuuvoq. Aavaat tusarnaartitsinissaat tullia oqaluffissaarsuami pissanngilaq, qallunaallu illoqarfeeraanni Holmstrupip oqaluffiani 3. december pissalluni.