aatsitassat
Aatsitassarsiorniat isumaqatigiinniutit saqqummiunnerat tupaallaatigaat
Tanbreez Mining aamma Naalakkersuisut suli isumaqatigiinngissuteqarput
Australiamiut aatsitassarsiorfiata Tanbreez Miningip Naalakkersuisunit isornartorsiorneqarnini tusagassiutit aqqutigalugut akerusunngilaa. Aatsitassarsiorniat ilaatigut isornartorsiorneqarput Killavaat Alannguanni aatsitassanik qaqutigoortunik atuinissamik qinnuteqaammi naammaginartumik takussutissanik ilanngussisisimanngitsutut.
Atuaruk: Jens-Eriup piumasaqarnera nersualaarneqarpoq
Inuussutissarsiornermut, aatsitassanut sulisoqarnermullu naalakkersuisoq Jens-Erik Kirkegaard Siumumeersoq marlunngornermi tusagassiutinut nalunaaruteqarluni nassuiaavoq sooq Tanbreez Miningip qinnuteqaataa naammassillugu suli suliarineqarsimannginnersoq.
Jens-Erik Kirkegaard isornartorsiuilluni arlalinnik saqqummiussaqarpoq taakkulu pissutaanerarpai Tanbreez Miningip qinnuteqaataata suli naammassillugu suliarineqarsimannginneranut.
Atuaruk: Naalakkersuisut aatsitassarsiorniat isumaqatiginngilaat
Periuseq ippinnartoq
- Periuseq ingerlanneqartoq ilisarisinnaanngilara pineqartumi taakkartorneqartoq, immikkuullarilluinnartumillu periuseqarnertut pisortaqarfiit tungaanniit iliuuserisatut isigalugu isumaqatigiinniarnerit suli ingerlasut pillugit nammineq isiginneriaatsimik saqqummiussisoqarmat, Greg Barnes tusagassiutinut nalunaarummi allappoq.
Jens-Erik Kirkegaardip ilaatigut Tanbreez Mining isornartorsiorpaa naammattumik takussutissiisimannginnerarlugu sooq aatsitassat Nunatta avataani suliareqqinneqartussaanerat pillugu aammalu paaserusullugu sooq tamanna Nunatsinni pisinnaannginnersoq. Aatsitassarsiorniat aamma isornartorsiorneqarput akuutissat toqunartullit aniatinnissaat naammattumik nassuiarsimannginnerarlugu.
Ukiut qulit ingerlassapput
Isornartorsiuinerit tamakkut Greg Barnesip akerusunngilai qilanaaralugulu isumaqatigiinniarnerit ingerlaqqinnissaat.
- Qilanaarivar isumaqatigiinniarnerit ingerlateqqinneqarnissaat, neriuutiginarpormi piffissami qaninnermi piujuartitsinissaq aallaavigalugu Kalaallit Nunaata kujataani suliffissanik pilersitsisoqarumaartoq, Greg Barnes oqarpoq.
Tanbreez Mining neriuppoq aatsitassarsiorfissaq sanallugu ukiormanna aallartissinnaassallutik aatsitassarsiornertaalu 2016-mi aallartissinnaassallugu. Tanbreez Miningip naliliinera malillugu ukiuni qulini aatsitassarsiornissamut naammattunik Killavaat Alannguanni aatsitassaqarpoq.