aatsitassarsiorneq
Aatsitassarsiornermut siunnersuisooqatigeeqalernissaa suleqatigiinnit nersualaarneqarpoq
Naalakkersuisunngortut aatsitassarsiornermut siunnersuisooqatigiinnik pilersitsinissaa sumulluunniit attuumassuteqanngitsut suleqatigiit nersualaarpaat, tassani aamma kikkut tamat oqartussaaqataanerulernissaat anguneqarsinnaassasoq neriuutigaat
Sumulluunniit attuumassuteqanngitsut suleqatigiit kikkut tamat oqartussaaqataanerannik suliniuteqartuusut Naalakkersuisunngortut nersualaarpaat.
Naalakkersuisooqatigiimmi aatsitassarsiornermut siunnersuisooqatigiinnik pilersitsiniarput, tamannalu suleqatigiinnit nuannaarutigineqarpoq.
Aatsitassarsiorniarnermut ammanerusumik sulisoqalernissaanut ammaassisuusinnaavoq. Innuttaasut paasisaqarfigilersinnaassavaat susoqassanersoq oqallinnermilu peqataasinnaalissallutik, suleqatigiit tassaasut ICC Greenland, Transparency International Greenland, KNAPK aamm WWF Verdensnaturfonden isumaqarput.
Aatsitassarsiornermi ilisimasallit nunarsuarmioqatigut siunnersuisooqatigiinnut siunnersuuteqarsinnaalissasut suleqatigiit nalunaarutigaat.
- Aatsitassarsiornermut siunnersuisooqatigiiffiup aallartinneqapallannissaa kissaatigaarput, aatsitassarsiornermut suliassanut tunngatillugit suliaqartussaapput. Aatsitassarsiorniarnermummi maannakkut misissuisoqaleruttorpoq, kikkut tamat oqartussaaqataanerannik pingaartitsisut nalunaaruteqarput.
Inatsisartut inissititserutitut ataatsimiissapput ullumi tallimanngornermi, Naalakkersuisunngortussat tassani aamma ivertinneqassapput.