aatsitassat
Aatsitassarsiornermi saqqummersitsivissuarmi Kalaallit Nunaat soqutigineqarluaqqittoq
Inuit 60-ngajaat peqataaffigisaannik suliffeqarfiit 40-t Canadaliassapput februaarip naanerani
Aatsitaasarsiorneq pillugu saqqummersitsiviit annersaat Canadami PDAC ukiut tallimassaat ingerlanneqassaaq.
Suliffeqarfiit 40-t sinnerlugit aammalu inuit 60-it sinnerlugit Canadap illoqarfianut Torontoliassapput februaarip naanerani.
PDAC-mi ukiut tamaasa inuit 50.000-t missaanniittut peqataasarput, tassani aatsitassarsiornikkut soqutigisaqaqatigiit, attaveqaatit kiisalu paasisassarsiornerit ingerlanneqartarput.
Aningaasaqarnermut aatsitassarsiornermullu naalakkersuisoq Anda Uldum, Demokraatit, Prospectors & Developers Association of Canada (PDAC)-mut peqataassasoq Sulisitsisut Peqatigiiffiat (GA) nalunaarpoq. GA angalanermut aaqqissuisooqqissaaq.
Politikkikkut aqutsineq patajaannerusoq
- Kalaallit Nunaat aatsitassarpassuaqarpoq ikumatissarpassuaqarlunilu, kisiannili teknikkikkut piumasaqaatit, silatta pissusaa, attaveqarnikkut pissutsit, tunisassiorfinnullu qitiusunut ungasilluni nunarsuarmi nunatta inissisimanera peqqutaallutik, nunap pisuussutaanik imminut akilersinnaasumik angisuumik iluaquteqarnissaq ulluminut ajornakusoorsimavoq. Ilutigisaanik aatsitassarsiorneq ikummatissarsiornerlu akit aningaasarsiornikkullu pissutsit allanngorarnerannut malussajasorujussuuvoq, taamaalillunilu nunat tamalaat aningaasaqarnikkut kinguariarnerat nunarsuarlu tamakkerlugu aningaasaliisarnikkut ajutoornerat, Kalaallit Nunaanni ikummatissaqarneranik aatsitassaqarneranik misissuinermik eqquerujussuarsimapput, GA-mi pisortaq Brian Buus Pedersen allappoq. Kalaallit Nunaanni naalakkersuinikkut nalorninartumik ullumimut ingerlatsisimaneq aatsitassanik ikummatissanillu tunisassiornikkut pitsaasumik ineriartortitsinissamut iluaqutaasimanngitsoq oqaatigaa, pitsaanerusumik politikkikkut ingerlatsisoqalernissaa ujartorpaa.
PDAC 2015 marsip aallaqqaataanit sisamaat ilanngullugu ingerlanneqassaaq.