Aatsitassarsiorfik assut serlersaarfigaat

Qeqertarsuatsiaat eqqaanni Tasiusaani True North Gemsip aatsitassarsiorfia serlersaarfigineqarsimavoq. Ukiumut aatsitassarsiorneq aallartinnissaq ajornakusoornerulerpoq qalluinissamut namminersorlutik oqartussat akuersissagaluarpata.

Tasiusaani aatsitassarsiorluni misissuiffik septemberip 19-at inuerukkallarneqarpoq anorersuarnissaa ilimasaarutigeqarmat. Sulisut tamarmik Nuummukarallarput misissuiffimmulli uteramik narrujuumminartumik takusaqarput.

- Tupersuagut ataaseq 100.000 koruuninik akillit, alittorneqarsimapput. Sarfaliuut generatori aserorterneqarsimavoq, vhf radiot tillinneqarsimallutik kiisalu misissugassatut katersat tillinneqarsimallutik, True North Gemsimi issittumi ingeniøri Tuperna Rix Sermitsiaq.AG-mut oqarpoq.

- Misissugassatut katersat tuniniagassatut naleqarpianngillat kisianni ilisimatuussutsikkut ilisimasanut pingaaruteqarluinnarput aammalu helikopteri atorlugu katersaagamik katersorneri aningaasarpassuarnik atuiffiusimallutik, Tuperna Rix oqarpoq.

300.000 koruunit naligat

Pisimasoq Nuummi politiinut nalunaarutigineqareerpoq, taamaattoq suli maannamut pasisaasoqanngilaq.

- Ukiut arlallit Qeqertarsuatsiaat eqqaanni suliniuteqarpugut serlersaarfigineqarsimanngisaannarlutalu. Serlersaarineq tillinniarnerlu 300.000 koruunit naligannik annaasaqarfittut nalilerparput. Qalluinissamut maanna akuerineqassagaluarutta ukioru aallartinnissamut aporfissaqarnerulerpugut. Tupersimaffik aallaqqaataaniit sanasariaqassavarput, Tuperna Rix oqarpoq.