2015-imut aningaasanut inatsit

Aatsitassarsiorfiit naatsorsuutigineqartumit suliffissaqartitsinnginnerusut

Aatsitassarsiorneq aamma naatsorsuutigineqartumit arriinnerusumik ingerlanneqarpoq, tamannalu suliffissaqartitsinermut eqquivoq

Vittus Qujaukitsoq
2015-imut aningaasanut inatsisissatut siunnersuut Vittus Qujaukitsoq, Siumumeersup saqqummiuppaa

Ilinniarfeqarfinni iliuuseqarnikkut siunissami ilinniartut sulinissaat isumannaarneqassaaq. 18-init 34-niillu ukiullit suliffissaaleqisut annertuumik eqqugaaqqapput, taakkunanngalu 90 procentit ilinniagaqarsimanngillat.

London Miningip Nuup kangerluani suliaqalernissaa neriunarfigineqaraluarpoq, taannami 1.000-nik suliffissaqartitsinissaa naatsorsuutigineqaraluarmat. Qaqagu aallartissanersoq suli ullulerneqanngilaq. Qeqertarsuatsiaani kanngussanik piiaaffissap suli aningaasaliiffigineqannginnera pissutaalluni aamma qaqagu aallartissanersoq ilisimaneqanngilaq.

Kalaallit Nunaanni 3.360-t suliffissaaleqisuusut nalunaarsorneqarpoq. 18-nit 34-nut ukiullit nunaqarfinni illoqarfinnilu suliffissaaleqisut amerlapput.

Aalisarneq
Inuusuttut amerlanerusut ilinniagaqarnissaat aallaavigalugu Naalakkersuisut aningaasanut inatsimmut siunnersuummi 2015-moortumut sulissutigineqarpoq. Inuusuttuni ilinnialertartut 100-nik amerlineqassasut Piareersarfinnullu isertartut 250-nik amerlineqassasut aningaasaliiffigineqassalluni. Piareersarfinnut isertut meeqqat atuarfianni angusatik pitsanngorsarniarlugit atuartarput.

- Aatsitassarsiornermi ineriartorneq naatsorsuutigisatsinnit arriinneruvoq. Aatsitassarsiornerup suliffissanik pilersitsisinnaanera annertuallaamik ilimasuutigivallaassanngilarput. Nunarsuatsinni aningaasarsiorneq iliuuseqarfigisinnaanngilarput, taannalu aatsitassarsiornermut eqquisuuvoq, aningaasaqarnermut naalakkersuisoq Vittus Qujaukitsoq, Siumut, tusagassiortunut katersortitsinermi oqarpoq.

Taamaattumik aalisarnermi periarfissat misissorneqarput.

- Kalaallit Nunaanni aalisakkat pisarineqarsimasut nunatsinni aamma suliarineqartalersinnaanerat sulissutigineqassaaq, kiisalu aamma tunitsivinni annertunerusumik sulisoqartarnissaa sulissutigineqassalluni, naalakkersuisoq oqarpoq.

Powered by Labrador CMS