aatsitassat

Aatsitassanut siunnersuisooqatigiinnik pilersitsisoqarnissaa tapersersorluarneqartoq

Arlaannulluunniit attuumassuteqanngitsumik aatsitassat pillugit siunnersortigisinnaasaannik pilersitsisoqarnissaanik Naalakkersuisut siunnersuutaat KNAPK-mit, ICC-mit WWF-imiillu tigulluarneqarpoq

Inatsisartut upernaanerani ataatsimiinnissaat ammarneqarmat assilineqartoq

Inatsisartut upernaanerani ataatsimiinnerat tallimanngornermi nalunaaqutaq 13.00 ammarneqarpoq.

Arlaannulluunniit attuumassuteqanngitsumik aatsitassat pillugit Naalakkersuisut inuiaqatigiillu siunnersortigisinnaasaannik pilersitsinissamut, upernaanerani ataatsimiinneq periarfissaqqinnerusinnaanngilaq, innuttaasut peqataatinneqarnerunissaannut suleqatigiit, KNAPK, ICC aamma WWF taamatut isumaqarput.

Siumut, Demokraatit kiisalu Atassutip naalakkersuisooqatigiinnissamut isumaqatigiissutaanni, aatsitassanut atatillugu siunnersuisooqatigiinnik pilersitsinissaq siunniunneqarpoq.

Maannakkut aamma upernaanerani ataatsimiinnermi ullumikkut aallartittumi Inuit Ataqatigiit siunnersuutigaat, aatsitassanut atatillugu siunnersuisooqatigiinnik, Naalakkersuisunut inuiaqatigiinnullu innersuussuteqarsinnaasunik, politikkikkut arlaannulluunniit attuumassuteqanngitsunik pilersitsinissaq.

Nunavumi ilaatigut misittagarineqarluartoq
- Assersuutigalugu Nunavut-mi aatsitassat pillugit oqallittoqartillugu immikkut ilisimasalinnik arlaannulluunniit attuumassuteqanngitsunik qangalili oqallinnermi tunngavilersuilluarsinnaanermik anguniagallit atortarnerannik misilittakkat isumassarsiorfiusinnaalluarput. Nunatsinnimi aatsitassat pillugit suliffeqarfiit paasissutissiissutaat, amerlasuutigut ajoraluartumik tutsuiginassusaat misilittarneqarsinnaasaratillu uuttortarneqarsinnaasanngillat. Tamanna aatsitassat pillugit siunnersuisooqatigiiliornikkut pitsanngorsarneqarsinnaavoq, Mette Frost, WWF-imi Nunarsuatsinni Pinngortitaq pillugu Illersuiniaqatigiiffimmi Kalaallit Nunaannut tunngasunik suleqataasoq tusagassiuutinut nalunaarummi oqarpoq.

Powered by Labrador CMS