urani pillugu oqallinneq
Aatsitassanut naalakkersuisunngorlaaq: Innuttaasut taasitinneqarnissaat puiguinnarsiuk
Urani pillugu innuttaasut taasitinneqarnissaannik piumasaqarneq sakkortusiartoqqilerpoq, Demokraatilli immikkut ittumik nuna tamakkerlugu arfininngorpat ataatsimeersuarnissaat, siulittaasumik qinersiffiusussaq sioqqullugu, tamanna itigartilluinnarpaat
Randi Vestergaard Evaldsen Demokraatini siulittaasutut arfininngorpat qinigaassagaluarpat, uranimik piiaasoqalersinnaanera pillugu innuttaasunik taasisitsisoqarnissaa akuersaarneqarnavianngilaq.
Naalakkersuisoqataasulli Atassutikkut apeqqut pillugu innuttaasut isumasiorneqartariaqartut, sapaatip-akunnerani kingullermi nalunaarutigigaluarpaat.
Siumup tamanna siusinnerusukkut innuttaasunut neriorsuutigigaluarpaa. Piumasaqaat tamanna IA-mit aamma Partii Naleqqamit aalajangiusimaneqarpoq.
Atuaruk: Urani pillugu inuit taasisinneqarnissaat Steen Lyngep kissaatigaa
Sangujoraannginneq
- Uannut akissutissaq suli naamiuvoq, Randi Vestergaard Evaldsen oqarpoq. Taanna Kim Kielsenimit aatsitassarsiornermut naalakkersuinikkut akisussaasutut qullerpaatut toqqarneqaqqammerpoq.
- Naalakkersuinikkut sangujoraartoqannginneranik ersersitsinissarput aamma aalajangiunneqareersunik qularnartunngortitsinitsigut aningaasaleerusussinnaasunik qimarratsitsinnginnissarput pingaartorujussuuvoq. Tamakkua uniffigiinnarnagit ingerlaqqinniarta, aatsitassarsiornermilu atugassarititaasut qularnaannerpaat qulakkeerniarniartigik. Kalaallit Nunaat nunatut allanngorartutut sangujoraartumillu siunnerfeqartutut, aalajangiussanillu qanoq iliallallunilu taamaatitsiinnartartutut ilisimaneqalissanngilaq, nangilluni oqarpoq.
Siuarsaaneq
Arfininngorpat kina ajugaassanersoq Demokraatit tunulequtaannut AG paasiniaammat, Randi Vestergaard Evaldsenip ajugaanissaa ilimanaateqarneruvoq.
Taassuma unammilertaata Justus Hansenip nalunaarutigaa unammillernermini killissaa tikillugu sukataarniarluni, siulittaasumulli qinigaassanngikkaluaruni siulittaasunngortussamut ataqqinnilluni sulissalluni.
Poul Hansen siulittaasumut qinigassanngortittut pingajuattut sassarluni, sapaatip-akunnerata siuliani nalunaaruteqarpoq. Taanna qinigassanngortittunit allanit marluusunit naalakkersuisoqatigiinni suleqatigiinnermut piumasaqaatimini sakkortusaarneruvoq:
- Naalakkersuinikkut anguniakkavut siuarsarneqassapput. Tusaaneqartariaqarpugut. Naalakkersuisunngortitsinermi isumaqatigiissut qinigaaffik tamakkerlugu atuutissaaq. Isumaqatigiissutini ilaatinneqanngikkutta – annerusumillu tusaaniarneqarnata – taava suleqatigiissutissaarussimassaagut, AG-mut oqarpoq.
Uani sapaatip-akunnerani AG-mi saqqummertumi allaaserisaq tamaat atuaruk, pisiniarfimmi uaniluunniit ataani e-aviisitut pisiarisinnaavat: